നടുവേദന എന്നത് ധാരാളം പേരെ അലട്ടുന്ന ഒരു പ്രശ്നമാണ്. ഇന്ന് സർവസാധാരണമായ ഒന്നായി മാറി ഇത്. നമ്മുടെ ദൈനംദിന ജീവിതത്തെ സാരമായി ബാധിക്കുന്ന നടുവേദനയ്‌ക്ക് നല്ല ചികിത്സ ആവശ്യമാണ്. പലരും നടുവേദന എന്ന് തുറന്നു പറയാൻ മടി കാണിക്കുന്നതും കാണാം. ഒന്നല്ല, പത്ത് നട്ടെല്ല് പൊട്ടുന്ന വേദനയും കടിച്ചമർത്തി ജീവിക്കുന്നവരുണ്ട്. പരിക്കുകൾ, ഭാരപ്പെട്ട ജോലികൾ, ചില രോഗലക്ഷണങ്ങൾ എന്നിവ മൂലം നടുവേദന ഉണ്ടാകാം. പ്രായഭേദമന്യേ ആർക്കും പിടിപെടാവുന്ന ഒന്നാണ് നടുവേദന. അതിന്റെ കാരണങ്ങൾ ഓരോരുത്തരിലും വ്യത്യാസപ്പെട്ടിരിക്കുമെന്ന് മാത്രം.
പ്രായമുള്ളവരിൽ നടുവേദന ഉണ്ടാവാൻ അവരുടെ ജോലിരീതികളോ നട്ടെല്ലിന്റെ കശേരുക്കളിലെ അസുഖങ്ങളോ കാരണമായേക്കാം. കശേരുക്കൾക്കിടയിലെ ഡിസ്‌ക്കുകൾ, നട്ടെല്ലിനും ഡിസ്കുകൾക്കും ചുറ്റുമുള്ള അസ്ഥിബന്ധങ്ങൾ, സുഷ്മ്നനാഡി, ഞരമ്പുകൾ, നട്ടെല്ലിലെ പേശികൾ, ആന്തരിക അവയവങ്ങൾ എന്നിവയിൽ ഉണ്ടാകുന്ന രോഗങ്ങൾ മൂലവും നടുവേദന അനുഭവപ്പെടാം. ഹൃദയരക്തധമനികളിലെ രോഗങ്ങൾ, നെഞ്ചിലുണ്ടാകുന്ന മുഴകൾ, നട്ടെല്ല് വീക്കം എന്നിവ മൂലം നടുവേദന ഉണ്ടാവാം.
നടുവേദനയെ രണ്ടു വിഭാഗങ്ങളായി തരം തിരിക്കാം. തീവ്ര വേദന വിഭാഗത്തിൽ പെട്ടതും ദീർഘകാലമായി നിലനിൽക്കുന്നതും. തീവ്ര വേദന വിഭാഗത്തിൽ പെട്ടവ പെട്ടെന്ന് ഉണ്ടാകുന്നതും ആറ് ആഴ്ച വരെ നീണ്ടു നിൽക്കുന്നതുമാണ്. എന്നാൽ രണ്ടാമത്തെ വിഭാഗത്തിൽ പെട്ടവ തുടർച്ചയായി മൂന്ന് മാസമോ അതിലധികമോ കാലം നീണ്ടു നിൽക്കുന്നതും കൂടുതൽ ശാരീരിക പ്രശ്നങ്ങൾ സൃഷ്ടിക്കുകയും ചെയുന്നു. നല്ല ചികിത്സ ലഭിച്ചാൽ നടുവേദനയെ നമുക്ക് അകറ്റി നിർത്താൻ സാധിക്കും.
സാധാരണ നടുവേദന ആണെങ്കിൽ ആവശ്യത്തിനുള്ള വിശ്രമത്തിലൂടയും വീട്ടുചികിത്സയിലൂടെയും നമുക്ക് മാറ്റിയെടുക്കാൻ കഴിയും. എന്നാൽ ചില സന്ദർഭങ്ങളിൽ ഡോക്ടറുടെ സഹായം തേടേണ്ടതുണ്ട്. വേദനാസംഹാരികളിലൂടെയും വേദനയുള്ള ഭാഗത്തു ചൂടുവെയ്‌ക്കുക, തണുത്ത ഐസ് വെയ്‌ക്കുന്നതിലൂടെയും വേദന മാറ്റാൻ കഴിയും. കഠിനമായ ജോലികൾ ഒഴിവാക്കുന്നതിലൂടെ വേദന കുറയ്‌ക്കാൻ കഴിയും. ചെറിയ വ്യായാമങ്ങൾ ചെയ്യണം. ഇതിലൂടെ പേശികളുടെ ബലക്കുറവ് പരിഹരിക്കാൻ കഴിയും.
ഗാർഹികചികിത്സയിലൂടെ വേദന കുറയുന്നില്ലെങ്കിൽ ഡോക്ടറുടെ ചികിത്സ തേടേണ്ടതാണ്. മരുന്നുകൾ, ഫിസിയോതെറാപ്പി മുതലായ ചികിത്സാരീതികൾ ഡോക്ടർ സ്വീകരിക്കുന്നു. ഫിസിയോ തെറാപ്പി, കോർട്ടിസോൺ കുത്തിവയ്പ്പുകൾ, ബോട്ടോക്സ്, ട്രാക്ഷൻ, കോഗ്നിറ്റീവ് ബിഹേവിയറൽ തെറാപ്പി, ട്രാൻസ്ക്യുട്ടേനിയസ് ഇലക്ട്രിക്കൽ നെർവ്വ് സ്റ്റിമുലേഷൻ, ശസ്ത്രക്രിയ എന്നിവയിലൂടെ നടുവേദന ചികിത്സിക്കാം.
