സാങ്കേതിക വിദ്യാഭ്യാസ വകുപ്പിന് കീഴിലെ 39 ടെക്നിക്കൽ ഹൈസ്കൂളുകളിലേക്ക് 2023-24 അദ്ധ്യായനവർഷത്തേക്കുള്ള പ്രവേശന നടപടികൾ ആരംഭിച്ചു. എട്ടാം ക്ലാസ്സ് പ്രവേശനത്തിനുള്ള അപേക്ഷയാണ് ക്ഷണിച്ചിട്ടുള്ളത്. www.polyadmission.org/ths -ൽ അപേക്ഷ സമർപ്പിക്കാവുന്നതാണ്. മാർച്ച് 15 മുതൽ ഏപ്രിൽ 5 വരെയാണ് അപേക്ഷ സമർപ്പിക്കുവാൻ സാധിക്കുക.
39 സ്കൂളുകളിലേക്കായി 3,275 സീറ്റുകളാണുള്ളത്. ഒരു വിദ്യാർത്ഥിക്ക് ഒന്നിലേറെ സ്കൂളുകളിൽ അപേക്ഷിക്കാൻ സാധിക്കും. 45 രൂപയാണ് പ്രവേശന ഫീസായി അടക്കേണ്ടത്. പ്രതിവർഷം 180 രൂപ മാത്രമാണ് ഫീസ്. ഏഴാം ക്ലാസ് ജയിച്ച 16 വയസ്സ് തികയാത്ത വിദ്യാർത്ഥികൾക്കാണ് അവസരം.
സീറ്റിനേക്കാൾ കൂടുതൽ അപേക്ഷകരുണ്ടെങ്കിൽ പ്രവേശന പരീക്ഷയുടെ അടിസ്ഥാനത്തിലായിരുക്കും അഡ്മിഷൻ ലഭ്യമാകുക. ഏഴാം ക്ലാസ് നിലവാരത്തിൽ കണക്ക്, സയൻസ്, ഇംഗ്ലീഷ്, മലയാളം, സാമൂഹികശാസ്ത്രം, പൊതുവിജ്ഞാനം, യുക്തിചിന്ത എന്നിവയിൽ ഒബ്ജക്ടീവ് ടൈപ്പ് ചോദ്യങ്ങളാണ് ഉണ്ടാവുക. ഏപ്രിൽ 12-ന് രാവിലെ 10 മുതൽ അതത് ടെക്നിക്കൽ സ്കൂളുകളിൽ വച്ച് തന്നെ പ്രവേശന പരീക്ഷ നടക്കും. 90 മിനിറ്റാണ് പരീക്ഷയുടെ സമയം. പരീക്ഷാഫലം അന്ന് തന്നെ പ്രഖ്യാപിക്കും. ജൂൺ ഒന്നിന് തന്നെ ക്ലാസുകൾ ആരംഭിക്കും.
Comments