ഞാൻ എഴുതൂല… ഞാൻ ബ്രസീൽ ഫാൻ ആണ്; എനിക്ക് മെസ്സിയെ ഇഷ്ടമല്ല

കോഴിക്കോട്: ഫുഡ്ബോൾ എന്ന് പറഞ്ഞാൽ മലയാളിക്ക് വികാരമാണ്. ഇക്കഴിഞ്ഞ ഖത്തർ ലോകകപ്പൊക്കെ വൻ ആവേശത്തോടെയാണ് മലയാളക്കര സ്വീകരിച്ചത്. കൊച്ചുകുട്ടികൾ മുതൽ പ്രായമായവർ വരെ ഫുഡ്‌ബോളിന് പിന്നാലെ ആയിരുന്നു. കേരളത്തിൽ അർജന്റീനക്കും ബ്രസീലിനുമാണ് ആരാധകർ ഏറെ. പോർച്ചുഗൽ ആരാധകരും ഒട്ടും കുറവല്ല. ഇപ്പോഴിതാ പരീക്ഷാ ചോദ്യപ്പേപ്പറിലും ഫുഡ്‌ബോൾ കയറിപ്പറ്റിയിരിക്കുകയാണ്. നാലാം ക്ലാസ് മലയാളം വാർഷികപ്പരീക്ഷയിലാണ് മെസ്സിയുടെ ജീവചരിത്രം തയ്യാറാക്കാൻ ആവശ്യപ്പെട്ടത്. എന്നാൽ ചോദ്യമല്ല ഇവിടെ ശ്രദ്ധേയമായിരിക്കുന്നത് വിദ്യാർഥി എഴുതിയ ഉത്തരമാണ്. ഞാൻ ബ്രസീൽ ഫാനാണെന്നും എനിക്ക് നെയ്മറിനെയാണ് ഇഷ്ടമെന്നും മെസ്സിയെ ഇഷ്ടമല്ലെന്നുമാണ് ചോദ്യത്തിന് ഉത്തരമായി വിദ്യാർത്ഥി എഴുതിയത്. മലപ്പുറം ജില്ലയിലെ തിരൂർ പുതുപ്പള്ളി ശാസ്ത എൽ.പി സ്‌കൂളിലെ ചോദ്യപേപ്പറാണ് ഇപ്പോൾ സമൂഹമാദ്ധ്യമങ്ങളിൽ പ്രചരിക്കുന്നത്. റിസ ഫാത്തിമ പി.വിയാണ് ഇങ്ങനെയൊരു ഉത്തരം എഴുതിയിരിക്കുന്നത്. വിദ്യാർത്ഥി ഇങ്ങനെയൊരു ഉത്തരം എഴുതിയത് ശ്രദ്ധയിൽപെടുകയും പിന്നീടത് തിരുത്താൻ ആവശ്യപ്പെടുകയും ചെയ്തെന്ന് അദ്ധ്യാപകൻ പറഞ്ഞിരുന്നു. വളരെ ഗൗരവത്തിൽതന്നെയാണ് റിസ തന്റെ ഉത്തരമെഴുതിയത്. അതേസമയം ഇതേ ചോദ്യത്തിന് മാത്രം നന്നായി ഉത്തരം എഴുതിയ വിദ്യാർത്ഥികളും ക്ലാസ്സിലുണ്ടെന്നും അദ്ധ്യാപകൻ പറഞ്ഞു. ക്രിസ്റ്റ്യാനോ റൊണാൾഡോയെക്കുറിച്ച് ചോദിക്കാത്തത്തിന് പരിഭവം പറഞ്ഞതായും രസകരമായ വിവരണങ്ങളാണ് വിദ്യാർത്ഥികൾ നൽകിയതെന്നും അദ്ദേഹം വ്യക്തമാക്കി.