സിനിമയിൽ സജീവമല്ലെങ്കിലും ശോഭന എന്ന നടി സിനിമാ പ്രേമികളുടെ ഹൃദയത്തിൽ തന്നെയാണ്. ചെയ്ത കഥാപാത്രങ്ങൾ കൊണ്ട് മാത്രമല്ല, സമൂഹമാദ്ധ്യമങ്ങളിൽ സജീവമായിരിക്കുന്നതിനാൽ കൂടിയാണ് സിനിമയിൽ നിന്ന് വിട്ടുനിൽക്കുമ്പോഴും പ്രേക്ഷകരുടെ മനസ്സിൽ ശോഭന ഇടം നേടുന്നത്. ആരാധകരുടെ ഇടയിൽ താരം സജീവമാണ്. തന്റെ ജീവിതത്തിലെ മനോഹര മുഹൂർത്തങ്ങൾ ഓരോന്നും ശോഭന ആരാധകർക്കായി പങ്കുവെയ്ക്കാറുണ്ട്. ഇപ്പോഴിതാ, ശോഭന പങ്കുവെച്ച ഒരു ചിത്രമാണ് സമൂഹമാദ്ധ്യമങ്ങളിൽ വൈറലാവുന്നത്.
പൊന്നിയിൻ സെൽവൻ 2-ന്റെ ട്രെയിലർ ലോഞ്ചിനിടയിൽ നിന്ന് പകർത്തിയ ഒരു ചിത്രമാണ് ശോഭന സോഷ്യൽമീഡിയയിൽ പങ്കുവെച്ചിരിക്കുന്നത്. ലോകസുന്ദരി ഐശ്വര്യ റായിയുടെയും ശോഭനയുടെയും നടുക്ക് ഒരു താരം കൂടി നിൽപ്പുണ്ട്. എന്നാൽ ആരാണെന്ന് ശോഭന വെളിപ്പെടുത്തിയിട്ടില്ല. ഇതാരണെന്ന് കണ്ടുപിടിക്കാമോ എന്ന് തന്റെ ആരാധകരോട് താരം ചോദിക്കുന്നു. ചിത്രത്തിൽ മൂന്ന് നടിമാരുടെയും പിറകിലായി നടൻ വിക്രമും ക്യാമറയ്ക്ക് പോസ് ചെയ്യുന്നത് കാണാം.
‘ഏറെ കാത്തിരുന്ന ചിത്രത്തിൽ ആരാണ് ഉള്ളതെന്ന് ഊഹിക്കൂ.. ഇത്രയും ഗംഭീരമായ ഒരു ഓഡിയോ റിലീസ് ചടങ്ങ്! മണിരത്നത്തിനും മുഴുവൻ ടീമിനും PS2-നും എല്ലാവിധ ആശംസകളും നേരുന്നു’- എന്നാണ് ചിത്രം പങ്കുവെച്ചുകൊണ്ട് ശോഭന കുറിച്ചിരിക്കുന്നു. ഇതിനോടകം നിരവധി പേരാണ് ചിത്രത്തിന് താഴെ കമന്റുമായി എത്തിയിരിക്കുന്നത്. ശോഭനയ്ക്കും ഐശ്വര്യ റായിക്കുമൊപ്പം ഉള്ളത് വിദ്യാബാലൻ ആണെന്നാണ് ഭൂരിപക്ഷം പേരും കമന്റ് ചെയ്തിരിക്കുന്നത്.
