മുംബൈ: ഹിൻഡൻബർഗ് റിപ്പോർട്ടിന്മേൽ രാഹുൽ നടത്തിയ ആരോപണങ്ങൾ തള്ളി എൻസിപി അദ്ധ്യക്ഷൻ ശരദ് പവാർ രംഗത്തുവന്നതോടെ കോൺഗ്രസ് പ്രതിരോധത്തിൽ. വിഷയത്തിൽ കോൺഗ്രസ് അദ്ധ്യക്ഷൻ മല്ലികാർജ്ജുൻ ഖർഗെ നേരിട്ട് പവാറുമായി ചർച്ച നടത്തുമെന്നാണ് ലഭിക്കുന്ന വിവരം. ഖർഗെ വിളിച്ചു ചേർക്കുന്ന പ്രതിപക്ഷ കക്ഷികളുടെ യോഗത്തിൽ പവാറിനെ എത്തിച്ച് വിഷയത്തിൽ ഉയർന്നിരിക്കുന്ന ചർച്ച അവസാനിപ്പിക്കാനാണ് കോൺഗ്രസ് നീക്കം.
ഹിൻഡൻബർഗ് റിപ്പോർട്ട് പ്രത്യേക ലക്ഷ്യം വച്ചുള്ളതാണെന്നായിരുന്നു പവാറിന്റെ പരാമർശം. വിഷയത്തിന് അനാവശ്യ പ്രാധാന്യമാണ് നൽകുന്നത്. ഇത് അന്വേഷിക്കാൻ സുപ്രീം കോടതി അന്വേഷണ സമിതിയെ നിയോഗിച്ചിട്ടുണ്ടെന്നും പിന്നെ ജെപിസി അന്വേഷണം ആവശ്യമില്ലെന്നും പവാർ കഴിഞ്ഞ ദിവസം പ്രതികരിച്ചിരുന്നു.
ഹിൻഡൻബർഗ് ഉയർത്തിക്കാട്ടി പ്രചരണം നടത്താനുള്ള കോൺഗ്രസിന്റെ നീക്കത്തിന് തിരിച്ചടി നൽകിയിരിക്കുകയാണ് പവാറിന്റെ പ്രതികരണം. സവർക്കർ വിഷയത്തിലും എൻസിപിയ്ക്ക് വിഭിന്ന നിലപാടാണുള്ളത്. സവർക്കർക്കെതിരെ രാഹുൽ നടത്തിയിരിക്കുന്ന പരാമർശങ്ങൾ തങ്ങൾക്ക് കൂടി തിരിച്ചടിയാകുമെന്ന് എൻസിപി വിലയിരുത്തുന്നു. ഉദ്ദവ് താക്കറെയും വിഷയത്തിൽ രാഹുലിനെ തള്ളി രംഗത്തുവന്നിരുന്നു.
