ലേഡി സൂപ്പർ സ്റ്റാർ നയൻതാരയ്‌ക്കും വിഘ്നേഷ് ശിവനും കഴിഞ്ഞ വർഷമായിരുന്നു ഇരട്ടകുട്ടികൾ പിറന്നത്. ഇതു ഞങ്ങളുടെ ഉയിരും ഉലകവും എന്ന് പറഞ്ഞായിരുന്നു ഇരുവരും കുഞ്ഞുങ്ങളെ ലോകത്തിന് പരിചയപ്പെടുത്തിയതും. കഴിഞ്ഞ ആഴ്ചയിലാണ് ഇരുവരും കുട്ടികളുടെ യഥാർത്ഥപേര് വെളിപ്പെടുത്തിയത്. ഇപ്പോഴിതാ, തങ്ങളുടെ കുഞ്ഞുങ്ങൾക്ക് ഉയിരെന്നും, ഉലകമെന്നും പേരിടാനുള്ള കാരണം വെളുപ്പെടുത്തിയിരിക്കുകയാണ് വിഘ്നേശ് ശിവൻ.
തങ്ങള്‍ക്ക് ഇഷ്ടപ്പെട്ട പേര് കുഞ്ഞുങ്ങള്‍ക്ക് ഇടുകയായിരുന്നെന്നും ആരെങ്കിലും പറയുന്നത് അനുസരിച്ച് പേരിടാൻ കഴിയില്ലെന്നും വിഘ്നേഷ് പറഞ്ഞു. കുട്ടികളുടെ പുതിയ പേരിനെക്കുറിച്ചും വിഘ്നേഷ് സംസാരിച്ചു. ഒരു അഭിമുഖത്തിലാണ് അദ്ദേഹം ഇക്കാര്യങ്ങള്‍ പറഞ്ഞത്.
‘വലിയ പ്രത്യേകതകളുള്ള പേരാണ് കുട്ടികള്‍ക്ക് ഇട്ടതെന്ന് എല്ലാവരും പറയുന്നു. ആ കാര്യം എനിക്ക് മനസിലാവുന്നില്ല. ഞങ്ങള്‍ അങ്ങോട്ടും ഇങ്ങോട്ടും ഉയിര്‍, ഉലകം എന്ന് തന്നെയാണ് വിളിക്കുക. അതായത് നയന്‍താരയെ ഞാന്‍ ഉയിര്‍ എന്നാണ് വിളിക്കുക. തിരിച്ച് എന്നെ ഉലകം എന്നാണ് നയന്‍ വിളിക്കുക. കുട്ടികള്‍ക്ക് പേര് ഇടേണ്ട സമയത്ത് എന്ത് പേര് വെക്കുമെന്ന് ഞങ്ങള്‍ കുറേ ആലോചിച്ചു.
നമ്മള്‍ അങ്ങോട്ടും ഇങ്ങോട്ടും ഉയിര്‍, ഉലകം എന്നൊക്കെയല്ലേ വിളിക്കുന്നത്. ഇതുതന്നെ എന്തുകൊണ്ട് നമ്മുടെ കുട്ടികളെയും വിളിച്ചുകൂടെന്ന് പെട്ടെന്ന് മനസില്‍ തോന്നി. നമ്മളുടെ പ്രതിഫലനം തന്നെയാണല്ലോ അവര്‍. ആ സമയത്ത് എനിക്ക് പെട്ടെന്ന് തോന്നിയതാണ് ആ പേരുകള്‍. എന്നാല്‍ ഇപ്പോള്‍ വീട്ടില്‍ ഭയങ്കര കണ്‍ഫ്യൂഷനാണ് വീട്ടില്‍ അവള്‍ ഉയിര്‍ എന്ന് വിളിക്കുമ്പോള്‍ ഞാനും നോക്കും കുഞ്ഞും നോക്കും.
അത്രമാത്രമേ ഉള്ളൂ, ഞങ്ങള്‍ അങ്ങോട്ടും ഇങ്ങോട്ടും അതുപോലെയാണ് വിളിക്കുക. അതുകൊണ്ട് അതേ പേര് തന്നെ കുട്ടികള്‍ക്കും വെച്ചു. പിന്നെ അതിന് ശേഷം നല്ല പേര് ഞങ്ങള്‍ മക്കള്‍ക്ക് ഇട്ടു. ഒരാള്‍ക്ക് രുദ്രോനീല്‍ എന്നും മറ്റേയാള്‍ക്ക് ദൈവിഗ് എന്നും വെച്ചു. ഞങ്ങള്‍ക്ക് ഇഷ്ടപ്പെട്ട പേര് കുഞ്ഞിന് ഇട്ടു. അത് ഞങ്ങളുടെ ഇഷ്ടമാണ്. ആരെങ്കിലും പറയുന്നത് കേട്ട് എന്റെ കുട്ടികള്‍ക്ക് പേര് വെക്കണമെന്ന് പറയുന്നത് അംഗീകരിക്കാന്‍ പറ്റില്ലല്ലോ. ഞങ്ങളുടെ കുട്ടികള്‍ക്ക് ഇഷ്ടമുള്ള പേര് വെക്കും. ഇപ്പോള്‍ ഇട്ട പേരുകള്‍ ബംഗോളി മിക്‌സ് ചെയ്തിട്ടുള്ളതാണ്. നയന്‍താര എന്നത് ബംഗോളി പേരാണ്.’- വിഘ്നേഷ് ശിവന്‍ പറഞ്ഞു.
Comments