സിനിമാ പ്രേമികൾ കാത്തിരിക്കുന്ന തെലുങ്ക് ചിത്രമായ തേജ സജ്ജ നായകവേഷത്തിൽ തിളങ്ങുന്ന ‘ഹനു-മാൻ’ ന്റെ ചിത്രീകരണം പൂർത്തിയായി. പ്രശസ്ത സംവിധായകൻ പ്രശാന്ത് വർമയുടെ സംവിധാനത്തിലൊരുങ്ങുന്ന സിനിമാറ്റിക് യൂണിവേഴ്സിലെ ആദ്യ ചിത്രമാണിത്. ചിത്രത്തിന്റെ ടീസർ നേരത്തെ പുറത്ത് വന്നിരുന്നു. സാമൂഹ്യമാദ്ധ്യമങ്ങളിൽ വമ്പൻ സ്വീകര്യതയാണ് ഹാനുമാൻ ടീസറിന് ലഭിച്ചത്. എന്നാൽ ചിത്രത്തിന്റെ ചിത്രീകരണം പൂർത്തിയായെന്നാണ് ഇപ്പോൾ പുറത്ത് വരുന്ന വാർത്ത.
ഗൗര ഹരിയാണ് ചിത്രത്തിന്റെ സംഗീത സംവിധാനം നിർവഹിച്ചിരിക്കുന്നത്. ഹനുമാൻ ജയന്തി ദിനത്തിൽ ചിത്രത്തിന്റെ ‘ഹനുമാൻ ചലിസ’എന്ന ലിറിക്കൽ ഗാനം അണിയറ പ്രവർത്തകർ പുറത്തുവിട്ടിരുന്നു. ഗാനം പുറത്ത് വന്നതോടെ ആരാധകർ അത് ആഘോഷമാക്കുകയും അഭിപ്രായങ്ങൾ സാമൂഹ്യമാദ്ധ്യമങ്ങളിലൂടെ പങ്കുവെയ്ക്കുകയും ചെയ്തിരുന്നു.
ഭഗവാൻ ഹനുമാന്റെ ശക്തി ലഭിക്കുന്ന അതിമാനുഷികനായ ഒരു യുവാവിന്റെ കഥയാണ് സിനിമ പറയുന്നത്. ‘അഞ്ജനാദരി’എന്ന സാങ്കൽപ്പിക ലോകത്താണ് ‘ഹനു- മാന്റെ’ കഥ നടക്കുന്നത്. ഹനുമാന്റെ ശക്തി നായകന് ലഭിക്കുന്നതും ‘അഞ്ജനാദരി’ എന്ന ലോകത്തെ രക്ഷിക്കുന്നതുമാണ് സിനിമയുടെ കഥ.
പാൻ ഇന്ത്യൻ ചിത്രമായ ‘ഹനു- മാൻ’ തെലുങ്ക്, ഹിന്ദി, മറാത്തി, തമിഴ്, കന്നഡ, മലയാളം റിലീസുകൾക്ക് പുറമെ ഇംഗ്ലീഷ്, സ്പാനിഷ്, കൊറിയൻ, ജാപ്പനീസ്, ചൈനീസ് ഭാഷകളിലും റിലീസിന് ഒരുങ്ങുകയാണ്.’ഹനു-മാന്റെ’ റിലീസ് എന്നായിരിക്കുമെന്ന് ചിത്രത്തിന്റെ അണിയറ പ്രവർത്തകർ ഉടൻ പ്രഖ്യാപിക്കും. പ്രൈംഷോ എന്റർടെയ്ൻമെന്റിന്റെ ബാനറിൽ കെ. നിരഞ്ജൻ റെഡ്ഡിയാണ് ചിത്രം നിർമ്മിക്കുന്നത്. വരലക്ഷ്മി ശരത്കുമാർ, വിനയ് റായ്, സത്യാ, രാജ് ദീപക് ഷെട്ടി തുടങ്ങിയ താരങ്ങളും ചിത്രത്തിൽ പ്രധാന വേഷത്തിലെത്തുന്നുണ്ട്. ശിവേന്ദ്രയാണ് ചിത്രത്തിന്റെ ഛായാഗ്രാഹകൻ.
