സംസ്ഥാനത്ത് വേനൽ ചൂട് ശക്തമാവുകയാണ്. റെക്കോർഡ് താപനിലയാണ് പലയിടങ്ങളിലും അനുഭവപ്പെടുന്നത്. ചൂട് ശക്തമാകുന്നതിനനുസരിച്ച് പല ബുദ്ധിമുട്ടുകളും ജനങ്ങൾക്ക് അനുഭവപ്പെടുന്നുണ്ട്. എത്രമാത്രം വെള്ളം കുടിച്ചാലും മതിയാകാത്ത അവസ്ഥയാണ്. കൊടും ചൂടിൽ ദാഹവും ക്ഷീണവും വർധിക്കുന്നതനുസരിച്ച് കൂടുതൽ പാനീയങ്ങൾ കുടിക്കാൻ നാം തിരഞ്ഞെടുക്കും. തണുത്ത കുപ്പി പാനീയങ്ങൾ വാങ്ങി കഴിക്കാത്തവർ വളരെ കുറവാണ്. എന്നാൽ ഇത്തരം പാനീയങ്ങൾ പരമാവധി ഒഴിവാക്കാൻ ശ്രദ്ധിക്കുക.
പതിവായി കുപ്പികളിൽ കിട്ടുന്ന സോഫ്റ്റ് ഡ്രിങ്കുകൾ കഴിക്കുന്നത്, പ്രത്യേകിച്ച് മധുരമടങ്ങിയത് കഴിക്കുന്നത് ബിപി, ഷുഗർ, അമിതവണ്ണം, വിഷാദം, ഹൃദയസംബന്ധമായ പ്രശ്നങ്ങൾ എന്നി രോഗങ്ങൾക്ക് കാരണമായേക്കാം. പഴങ്ങളിലും മറ്റും ‘നാച്വറൽ’ ആയി കാണപ്പെടുന്ന മധുരം പോലെയല്ല കുപ്പി പാനീയങ്ങളിലെയും പ്രോസസ്ഡ്- പാക്കേജ്ഡ് ഭക്ഷണങ്ങളിലെയും മധുരം. ഇത് പതിവായി അകത്തുചെന്നാൽ ക്രമേണ ഇത് വലിയ പ്രശ്നങ്ങൾക്ക് കാരണമാകാം.
ആഴ്ചയിൽ ഒരു ബോട്ടിൽ എന്ന അളവിൽ പൂർണ ആരോഗ്യമുള്ള ഒരാൾക്ക് കുപ്പി പാനീയം കഴിക്കുന്നതിൽ പ്രശ്നമില്ല. എന്നാൽ പോലും ഷുഗർ, ബിപി പോലുള്ള ആരോഗ്യാവസ്ഥകളെല്ലാം നിയന്ത്രണത്തിലാണെന്ന് ഉറപ്പ് വരുത്തണം. കുപ്പി പാനീയങ്ങൾക്ക് പകരം ഫ്രൂട്ട്സ്, ഇളനീർ, മോര്-സംഭാരം പോലുള്ള പാനീയങ്ങൾ കൂടുതൽ കഴിക്കുന്നതാണ് ഉചിതം. വേനലിൽ വ്യാപകമായ ആരോഗ്യപ്രശ്നങ്ങളും നിർജലീകരണവും തോൽപിക്കുന്നതിനും ഇവ തന്നെയാണ് കാര്യമായും സഹായകമാവുക.
Comments