ന്യൂഡൽഹി: രാജ്യത്തിലെ സാധാരണക്കാരുടെ ആഗ്രഹങ്ങൾ നിറവേറ്റാൻ സർക്കാർ സംവിധാനങ്ങൾ പിന്തുണയ്‌ക്കണമെന്ന് പ്രധാനമന്ത്രി നരേന്ദ്രമോദി. വികസിത ഇന്ത്യയെ കെട്ടിപടുത്തുയർത്തുന്നതിന് സാധാരണക്കാരുടെ ആഗ്രഹങ്ങളും അഭിലാഷങ്ങളും പിന്തുണയ്ക്കണം എന്ന് രാജ്യത്തെ സിവിൽ സർവീസുകാരോട് പ്രധാനമന്ത്രി പറഞ്ഞു. സിവിൽ സർവീസ് ദിനത്തിന്റെ സമാപന സമ്മേളനത്തിൽ സംസാരിക്കുകയായിരുന്നു അദ്ദേഹം.
‘ഇന്ത്യയിലെ ഓരോ സർക്കാർ ജീവനക്കാരും ജനങ്ങളുടെ സ്വപ്‌നങ്ങൾ സാക്ഷാത്കരിക്കുന്നതിന് രാജ്യത്തെ സഹായിക്കണം. ഇന്ത്യ സ്വാതന്ത്ര്യത്തിന്റെ 75 വർഷം പൂർത്തിയാക്കുന്ന സമയമാണിത്. രാജ്യം സ്വാതന്ത്ര്യത്തിന്റെ നൂറാം വർഷം ആഘോഷിക്കാൻ പോകുന്ന അടുത്ത 25 വർഷത്തേക്കുള്ള എല്ലാ പദ്ധതികളും സർക്കാർ ആസൂത്രണം ചെയ്യുന്നുണ്ട്. കഴിഞ്ഞ് ഒൻപത് വർഷത്തിനുള്ളിൽ വികസനത്തിന്റെ വലിയൊരു കുതിച്ചുച്ചാട്ടമാണ് ഇന്ത്യയിൽ ഉണ്ടായത്’പ്രധാനമന്ത്രി പറഞ്ഞു.
‘രാഷ്‌ട്രം ഒന്നാമതാണ് എന്നതാണ് ഇന്നത്തെ സർക്കാരിന്റെ മുദ്രാവാക്യം. രാജ്യത്തിലെ സംസ്ഥാന സർക്കാരായാലും കേന്ദ്ര സർക്കാരായാലും ജനങ്ങൾ നിങ്ങളിൽ വളരെയധികം വിശ്വാസമർപ്പിച്ചിട്ടുണ്ട്. ആ വിശ്വാസം നിലനിർത്തുകയും ജനങ്ങൾക്കായി പ്രവർത്തിക്കുകയും ചെയ്യണം. നിങ്ങളുടെ തീരുമാനങ്ങളുടെ അടിസ്ഥാനം എന്നും രാജ്യത്തിന്റെ ക്ഷേമം മാത്രമായിരിക്കണം’എന്നും പ്രധാനമന്ത്രി കൂട്ടിച്ചേർത്തു.
Comments