തെന്നിന്ത്യയുടെ സൂപ്പർ ഹിറ്റ് സംവിധായകൻ മണിരത്നത്തിന്റെ സ്വപ്‌ന ചിത്രമാണ് പൊന്നിയിൻ സെൽവൻ. ഇതിഹാസ സാഹിത്യകാരൻ കൽക്കിയുടെ വിശ്വ പ്രസിദ്ധമായ ചരിത്ര നോവലിനെ ആധാരമാക്കിയാണ് ചിത്രം. ആദ്യ പാർട്ട് ഇരുകൈയും നീട്ടിയാണ് പ്രക്ഷകർ സ്വീകരിച്ചത്. ഇപ്പോൾ മണിരത്നത്തിന്റെ ‘പൊന്നിയിൻ സെൽവൻ 2’ കാത്തിരിക്കുകയാണ് പ്രക്ഷകർ. രണ്ടാം ഭാഗം ഏപ്രില്‍ 28ന് റിലീസ് ചെയ്യും.
ഇപ്പോഴിതാ പൊന്നിയിന്‍ സെല്‍വന്‍ രണ്ടാം ഭാഗത്തിലെ ‘ചിന്നഞ്ചിരു നിലവേ… ‘എന്ന ഗാനത്തിന്റെ ടീസര്‍ പുറത്തിറങ്ങിയിരിക്കുകയാണ്. ഐശ്വര്യ റായ് അവതരിപ്പിക്കുന്ന നന്ദിനി എന്ന കഥാപാത്രവും വിക്രമിന്റെ ആദിത്യ കരികാലനും കണ്ടുമുട്ടുന്ന രംഗങ്ങളാണ് ഗാനത്തില്‍ ഉടനീളം. ഇളങ്കോ കൃഷ്ണന്‍ രചിച്ച ‘ചിന്നഞ്ചിരു നിലവേ…’ എന്ന ഗാനം ആലപിച്ചിരിക്കുന്നത് ഹരിചരണാണ്. എ.ആര്‍ റഹ്മാനാണ് സംഗീത സംവിധാനം നിര്‍വഹിച്ചിരിക്കുന്നത്. കൗമാര കാലത്ത് പ്രണയിതാക്കളായിരുന്ന നന്ദിനിയും ആദിത്യ കരികാലനും പിന്നീട് ബദ്ധശത്രുക്കളായി മാറുന്നത് സിനിമയുടെ ആദ്യഭാഗത്തില്‍ അവതരിപ്പിച്ചിരുന്നു. അരുള്‍മൊഴി വര്‍മന്റെ മരണവാര്‍ത്ത അറിഞ്ഞതിനെ തുടര്‍ന്ന് തഞ്ചവൂരില്‍ ആദിത്യ കരികാലന്‍ മടങ്ങിയെത്തുമ്പോഴാണ് നന്ദിനിയെ കണ്ടു മുട്ടുന്നത്.
ഈ ചരിത്ര സിനിമയിൽ വലിയ ഗ്രാഫിക് ഫ്രെയിമുകൾ ഉൾപ്പെട്ടിരിക്കുന്നു എന്നതും ലോകമെമ്പാടുമുള്ള സാങ്കേതിക വിദഗ്ധരെ ചിത്രത്തിനായി നിർമ്മാതാക്കൾ നിയോഗിച്ചിട്ടുണ്ടെന്നതും എല്ലാവർക്കും അറിയാവുന്ന വസ്തുതയാണ്. എന്നാൽ ചില സാങ്കേതിക പ്രശ്‌നങ്ങൾ കാരണം പോസ്റ്റ്-പ്രൊഡക്ഷൻ ജോലികൾ വൈകിയെന്നും പുതിയ റിലീസിനായി നിർമ്മാതാക്കൾ ലക്ഷ്യമിടുന്നുവെന്നുമാണ് സമൂഹ മാദ്ധ്യമങ്ങളിൽ ഉയരുന്ന വാർത്ത. എന്നിരുന്നാലും, മണിരത്നത്തിന്റെ ‘പൊന്നിയിൻ സെൽവൻ 2’ പ്രഖ്യാപിച്ചതുപോലെ ഏപ്രിൽ 28 ന് റിലീസ് ചെയ്യുമെന്ന് പ്രൊഡക്ഷൻ ഹൗസുമായി അടുത്ത വൃത്തങ്ങൾ സ്ഥിരീകരിച്ചു.
തെന്നിന്ത്യയിൽ നിന്നും വലിയ താരനിരയാണ് അണിനിരക്കുന്നു എന്നതാണ് ചിത്രത്തിന്റെ പ്രത്യേകത . വിക്രം, ജയംരവി, കാർത്തി, റഹ്മാൻ, പ്രഭു, ശരത് കുമാർ, ജയറാം, പ്രകാശ് രാജ്, ലാൽ, വിക്രം പ്രഭു, പാർത്ഥിപൻ, ബാബു ആൻ്റണി, അശ്വിൻ കാകുമാനു, റിയാസ് ഖാൻ, ഐശ്വര്യാ റായ് ബച്ചൻ, തൃഷ, ശോഭിതാ ദുലിപാല, ജയചിത്ര തുടങ്ങി ഒട്ടേറേ അഭിനേതാക്കൾ ചിത്രത്തിലുണ്ട്. 125 കോടിക്കാണ് ചിത്രത്തിന്റെ സ്ട്രീമിങ്ങ് അവകാശം വിറ്റുപോയതെന്നായിരുന്നു റിപ്പോര്‍ട്ട്. ആമസോണ്‍ പ്രൈം വീഡിയോയാണ് ചിത്രത്തിന്റെ സ്ട്രീമിംഗ് സ്വന്തമാക്കിയത്. തമിഴിനു പുറമേ മലയാളം, തെലുങ്ക്, കന്നഡ, ഹിന്ദി ഭാഷകളിലും ചിത്രം പ്രദര്‍ശനത്തിന് എത്തിയിരുന്നു.
