ഇന്ദ്രൻസും മീനാക്ഷിയും ഒന്നിച്ചെത്തുന്ന പുതിയ ചിത്രം പ്രൈവറ്റ്; ചിത്രീകരണം നാളെ കോട്ടയത്ത് ആരംഭിക്കും

ഇന്ദ്രൻസ്, മീനാക്ഷി അനൂപ് എന്നിവർ കേന്ദ്രകഥാപാത്രങ്ങളായി എത്തുന്ന ചിത്രമാണ് പ്രൈവറ്റ്. നവാഗതനായ ദീപക് സംവിധാനം നിർവഹിക്കുന്ന ചിത്രം നാളെ കോട്ടയത്ത് ചിത്രീകരണം ആരംഭിക്കും. മലപ്പുറത്ത് നിന്ന് ഒരു പെൺകുട്ടി ഒളിച്ചോടിപ്പോവുന്നതും തുടർന്നുണ്ടാവുന്ന സംഭവങ്ങളുമാണ് ചിത്രത്തിന്റെ ഇതിവൃത്തം.

ചിത്രത്തിൽ ഇന്ദ്രൻസ് ഒരു ഫാം ജീവനക്കാരന്റെ വേഷത്തിമാണ് അവതരിപ്പിക്കുന്നത്. അഞ്ച് ദിവസത്തെ ചിത്രീകരണമാണ് കോട്ടയത്ത് ഷെഡ്യൂൾ ചെയ്തിരിക്കുന്നത്. റോഡ് മൂവിയായി ഒരുങ്ങുന്ന ചിത്രത്തിന്റെ മറ്റ് പ്രധാന ലോക്കേഷനുകൾ കമ്പം, തേനി, പൊള്ളാച്ചി എന്നിവിടങ്ങളാണ്.

നായാട്ട് എന്ന ചിത്രത്തിലൂടെ ശ്രദ്ധേയരായ കിരൺ, അഞ്ജന അപ്പുക്കുട്ടൻ എന്നിവരാണ് ചിത്രത്തിലെ മറ്റ് പ്രധാന താരങ്ങൾ. ടീം ഫാക്ടറി എന്റടെയ്ൻമെന്റ് ബാനറിൽ നിർമ്മിക്കുന്ന ചിത്രത്തിന്റെ ഛായാഗ്രഹണം നിർവഹിക്കുന്നത് ഫൈസൽ അലിയാണ്. പ്രൊഡക്ഷൻ കൺട്രോളർ നീജിൽ ദിവാകരനാണ്. ബാലതാരമായി വെള്ളിത്തിരിയിലെത്തിയ മീനാക്ഷി അമർ അക്ബർ അന്തോണി എന്ന ചിത്രത്തിലെ ഫാത്തിമ എന്ന കഥാപാത്രത്തിലൂടെയാണ് ശ്രദ്ധേയയാവുന്നത്. ഫഹദ്ഫാസിൽ ചിത്രം പാച്ചുവും അത്ഭുത വിളക്കും എന്ന ചിത്രമാണ് ഇന്ദ്രൻസിന്റേതായി ഏറ്റവും ഒടുവിൽ പുറത്തിറങ്ങിയ ചിത്രം.