കേരള സ്റ്റോറി ഇന്ത്യയിൽ ജീവിക്കുന്ന മുസ്ലീം സമൂഹത്തിന് കൂടുതൽ പ്രതിസന്ധി സൃഷ്ടിക്കും; സിനിമ പ്രദർശനത്തിനെത്തിയാൽ പ്രതിഷേധിക്കുമെന്നറിയിച്ച് എസ്ഡിപിഐ

ചെന്നൈ: സുധിപ്‌തോ സെൻ സംവിധാനം നിർവഹിച്ച ദ കേരള സ്‌റ്റോറി നാളെ പ്രദർശനത്തിന് എത്താനിരിക്കെ ചിത്രം നിരോധിക്കണമെന്ന ആവശ്യം ഉന്നയിച്ച് എസ്ഡിപിഐ. തമിഴ്‌നാട്ടിലെ സമാധാന അന്തരീക്ഷം തകർക്കുന്ന തരത്തിലാണ് ചിത്രത്തിന്റെ ഉള്ളടക്കമെന്ന് എസ്ഡിപിഐ സംസ്ഥാന പ്രസിഡന്റ് നെല്ലൈ മുബാറക് വ്യക്തമാക്കി. ചിത്രം തിയേറ്ററിൽ പ്രദർശനത്തിനെത്തിയാൽ പ്രതിഷേധിക്കുമെന്നും എസ്ഡിപിഐ നേതാവ് പ്രഖ്യാപനം നടത്തി.

ഇന്ത്യയിൽ ജീവിക്കുന്ന മുസ്ലീം സമൂഹത്തെ കേരള സ്റ്റോറി കൂടുതൽ പ്രതിസന്ധിയിലാക്കും. മുസ്ലീം സമുദായത്തിന് എതിരെയുള്ള നുണക്കഥകളാണ് സിനിമയിൽ ഉള്ളത്. തങ്ങളുടെ സംസ്‌കാരത്തെയും പാരമ്പര്യത്തെയും കുറിച്ച് തെറ്റായ പ്രചാരണങ്ങൾ നടത്തി സമൂഹത്തിൽ ഭീതി ജനിപ്പിക്കാനാണ് ശ്രമിക്കുന്നത്. വർഗീയ വിദ്വേഷവും മത സംഘർഷവും ഉണ്ടാക്കാനും സമാധാന അന്തരീക്ഷം തകർക്കാനുമാണ് ഇവരുടെ ശ്രമമെന്നും മുബാറക് ആരോപിച്ചു.

ആവിഷ്‌കാര സ്വാതന്ത്ര്യത്തിന്റെ പേരിൽ ഇത്തരം ചിത്രങ്ങൾ പ്രദർശിപ്പിക്കാൻ അനുമതി നൽകരുതെന്നും മുബാറക് പരാമർശിച്ചു. ന്യൂനപക്ഷ മുസ്ലീം സമുദായം നേരിടുന്ന പ്രശ്‌നങ്ങളെക്കുറിച്ച് സംസാരിക്കാതെ വ്യാജ പ്രചാരണങ്ങൾ നടത്തുകയാണ് ഇവർ ചെയ്യുന്നത്. അതുകൊണ്ട് തന്നെ ഇത്തരം രാഷ്‌ട്രീയ പ്രേരിത പ്രചരണ സിനിമകൾ നിരോധിക്കണമെന്നും മുബാറക് ആവശ്യം ഉന്നയിച്ചു. സിനിമ പ്രദർശിപ്പിക്കുകയാണെങ്കിൽ പാർട്ടി പ്രതിഷേധം സംഘടിപ്പിക്കുമെന്നും എസ്ഡിപിഐ നേതാവ് അറിയിച്ചു.