ബെംഗളൂരു: ബെംഗളൂരുവിൽ കനത്തമഴ മൂലം ജനജീവിതം സ്തംഭിച്ചു. പ്രധാനറോഡുകൾ ഉൾപ്പെടെ വെള്ളത്തിനടിയിലായി. വെള്ളക്കെട്ടിൽപ്പെട്ട് യുവതി മരിച്ചു. ആന്ധ്രാപ്രദേശ് സ്വദേശിനി ഭാനുരേഖയാണ് മരിച്ചത്. അടിപ്പാതയിലെ വെള്ളക്കെട്ടിൽ കാർ മുങ്ങിയാണ് അപകടം ഉണ്ടായത്. സംഭവ സമയം അഞ്ച് പേർ കാറിൽ ഉണ്ടായിരുന്നു.
കാറിന്റെ പിൻസീറ്റിലിരുന്ന യുവതി കുടുങ്ങി പോവുകയായിരുന്നു. രക്ഷാപ്രവർത്തകർ യുവതിയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഉച്ചതിരിഞ്ഞ് മൂന്നുമണിയോടെയാണ് മഴ ശക്തമായത്. മഴയ്‌ക്കൊപ്പം ആലിപ്പഴ വർഷവുമുണ്ടായി. മല്ലേശ്വരം, തെക്കൻ ബെംഗളൂരു ഉൾപ്പെടെയുള്ള ഭാഗങ്ങളിൽ ശക്തമായ ആലിപ്പഴ വർഷമുണ്ടായി.
മരങ്ങൾ കടപുഴകി വീണ് പലയിടങ്ങളിലും ഗതാഗതം തടസപ്പെട്ടു. ശനിയാഴ്ച രാത്രിയിൽ നഗരത്തിൽ 33 മില്ലീമീറ്റർ മഴ ലഭിച്ചിരുന്നു. മേയ് 25 വരെ ഇടിമിന്നലോട് കൂടിയ ശക്തമായ മഴയ്‌ക്ക് സാദ്ധ്യതയുണ്ടെന്നാണ് കാലാവസ്ഥാ വകുപ്പിന്റെ പ്രവചനം.
