ഇരുട്ടിൽ സ്മാർട്ട് ഫോൺ ഉപയോഗിക്കുന്നവരാണോ നിങ്ങൾ; സ്മാർട്ട്ഫോൺ വിഷൻ സിൻഡ്രോം നിങ്ങളെയും ബാധിച്ചേക്കാം

നിരവധി കാഴ്ചാവൈകല്യങ്ങളുമായിട്ടാണ് ഹൈദരാബാദ് സ്വദേശിനിയായ മഞ്ജു എന്ന പെൺകുട്ടി ഡോ: സുധീറിനെ കാണാൻ എത്തുന്നത്. ചില പോയിന്റുകളിൽ ശ്രദ്ധ കേന്ദ്രീകരിക്കാൻ പോലും അവർക്ക് കഴിയുന്നുണ്ടായിരുന്നില്ല. പരിശോധനയ്‌ക്ക് ശേഷം അവർക്കു സ്‌മാർട്ട്‌ഫോൺ വിഷൻ സിൻഡ്രോം (എസ്‌വിഎസ്) ഉണ്ടെന്ന് കണ്ടെത്തി. ഇരുട്ടിൽ കൂടുതൽ സമയം ഫോണിൽ ചിലവഴിക്കുന്ന ശീലമാണ് മഞ്ജുവിന്റെ കാഴ്‌ച നഷ്ടപ്പെടാൻ കാരണമെന്നു കണ്ടെത്തി.

മഞ്ജുവിന് കൃത്യസമയത്ത് ചികിത്സ ലഭിച്ചെങ്കിലും, “കമ്പ്യൂട്ടർ വിഷൻ സിൻഡ്രോം” (സിവിഎസ്) , “ഡിജിറ്റൽ വിഷൻ സിൻഡ്രോം” എന്നൊക്കെ അറിയപ്പെടുന്ന സ്മാർട്ട്ഫോൺ വിഷൻ സിൻഡ്രോം (എസ്‌വിഎസ്) കാരണം ഇക്കാലത്ത് നിരവധി ആളുകൾക്ക് ഭാഗികമായോ പൂർണ്ണമായോ കാഴ്ചാ നഷ്ടമുണ്ടാകുന്നു. Data.ai (മുൻപ് App Annie) യുടെ സർവ്വേ പ്രകാരം,ഇന്ത്യയിലെ ശരാശരി സ്‌മാർട്ട്‌ഫോൺ ഉപഭോഗം 2019-ൽ 3.7 മണിക്കൂറും 2020-ൽ 4.5 മണിക്കൂറും 2021-ൽ പ്രതിദിനം 4.7മണിക്കൂറും ആയിരുന്നു.ഇതു കൂടാതെ ഇരുണ്ട മുറികളിൽ കുറഞ്ഞ വെളിച്ചത്തിൽ സെൽ ഫോൺ ഉപയോഗിക്കുന്ന വ്യക്തികളുടെ എണ്ണം വർദ്ധിച്ചുകൊണ്ടിരിക്കുകയാണ്. കൂടുതൽ നേരം മൊബൈൽ ഉപകരണങ്ങൾ ഉപയോഗിക്കുന്നതിലുപരി ഇത്തരം ഇരുട്ടിലെ മൊബൈൽ നോട്ടങ്ങൾ അതെത്ര ചെറിയ സമയം ആണെങ്കിലും പോലും നിങ്ങളെ അന്ധനാക്കി മാറ്റും.

സ്മാർട്ട്‌ഫോൺ, ലാപ്‌ടോപ്പുകൾ, ടാബ്‌ലെറ്റുകൾ തുടങ്ങിയ ഡിജിറ്റൽ ഉപകരണങ്ങളിൽ കണ്ണു നട്ട് ദീർഘനേരം ചെലവഴിക്കുന്ന ആളാണോ നിങ്ങൾ.?

എങ്കിൽ ഇതിൽ പറയുന്ന അപകടം നിങ്ങളുടെ കാഴ്ചയെയും ബാധിച്ചേക്കാം.

ഇത്തരത്തിലുള്ള ആളുകളെ ബാധിക്കുന്ന ഒരു അവസ്ഥയാണ് ഡിജിറ്റൽ ഐ സ്‌ട്രെയിൻ എന്നറിയപ്പെടുന്ന “സ്മാർട്ട്‌ഫോൺ വിഷൻ സിൻഡ്രോം”. ഈ ഉപകരണങ്ങളിൽ നിന്ന് പുറപ്പെടുന്ന നീല വെളിച്ചത്തിലേക്ക് നീണ്ടസമയം നോക്കിയിരുന്നാൽ കണ്ണുകൾ ഈ അവസ്ഥക്ക് വിധേയമാകും.
ബ്ലൂ ലൈറ്റ് എക്സ്പോഷർ, സ്‌ക്രീൻ ഗ്ലെയർ, ബ്ലിങ്കിംഗ് ഇങ്ങിനെ പല ഘടകങ്ങളും സ്‌മാർട്ട്‌ഫോൺ വിഷൻ സിൻഡ്രോമിനു കാര്യമാണ്. ഡിജിറ്റൽ ഉപകരണങ്ങൾ പുറപ്പെടുവിക്കുന്ന ഉയർന്ന ഊർജ്ജമുള്ള (HEV) നീലവെളിച്ചം കണ്ണുകളിലേക്ക് തുളച്ചുകയറുകയും റെറ്റിനയ്‌ക്ക് കേടുപാടുകൾ വരുത്തുകയും പലവിധ കാഴ്ചാ പ്രശ്നങ്ങൾക്കും കാരണമാവുകയും ചെയ്യും. സ്‌ക്രീൻ ഗ്ലെയർ കണ്ണുകൾക്ക് ആയാസമുണ്ടാക്കും, തലവേദന ഉണ്ടാക്കും, ഈ ഉപകരണങ്ങളുടെ ബ്ലിങ്കിങ് കണ്ണുകൾക്ക് വരൾച്ചയും അസ്വസ്ഥതയുമുണ്ടാക്കും.

സ്മാർട്ട്ഫോൺ വിഷൻ സിൻഡ്രോം എത്രകാലം നീണ്ടുനിൽക്കും?
സ്‌മാർട്ട്‌ഫോൺ വിഷൻ സിൻഡ്രോമിന്റെ ദൈർഘ്യം വ്യക്തിയെയും രോഗലക്ഷണങ്ങളുടെ തീവ്രതയെ ആശ്രയിച്ച് വ്യത്യാസപ്പെടാം. മിക്ക കേസുകളിലും, ലക്ഷണങ്ങൾ താൽക്കാലികമാണ്, സ്‌ക്രീൻ സമയത്തിൽ നിന്ന് പതിവായി ഇടവേളകൾ എടുക്കുന്നതിലൂടെയും നിങ്ങളുടെ ഉപകരണത്തിന്റെ തെളിച്ചവും ദൃശ്യതീവ്രതയും ക്രമീകരിക്കുന്നതിലൂടെയും സ്‌ക്രീൻ സുഖപ്രദമായ അകലത്തിൽ സ്ഥാപിക്കുന്നതിലൂടെയും ഈ അപകടത്തിൽ നിന്നും രക്ഷ നേടാനാകും.

സ്മാർട്ട്ഫോൺ വിഷൻ സിൻഡ്രോം തടയാൻ നിങ്ങൾക്ക് എന്തുചെയ്യാൻ കഴിയും?

കണ്ണിന് അസ്വസ്ഥതയുടെ നേരിയ ലക്ഷണങ്ങൾ കാണുമ്പോൾത്തന്നെ നിങ്ങളുടെ സ്‌ക്രീൻ സമയം കുറയ്‌ക്കുകയും നല്ല നേത്ര പരിചരണ ശീലങ്ങൾ പരിശീലിക്കുകയും ചെയ്യണം. പക്ഷെ ലക്ഷണങ്ങൾ മാറുന്നില്ലെങ്കിൽ നേത്രരോഗങ്ങൾ ഉണ്ടെന്നു സംശയിക്കണം. അതിനാൽ എത്രയും വേഗം വൈദ്യസഹായം തേടുക.

കണ്ണുകളുടെ ആയാസം കുറയ്‌ക്കാൻ സഹായിക്കുന്ന ചില നുറുങ്ങുകൾ ഇതാ:
ഇടവേളകൾ എടുക്കുക: ഡിജിറ്റൽ ഉപകരണങ്ങളിൽ നിന്ന് ഇടയ്‌ക്കിടെ ഇടവേളകൾ എടുക്കുന്നത് കണ്ണിന്റെ ആയാസം കുറയ്‌ക്കാനും ബുദ്ധിമുട്ട് തടയാനും സഹായിക്കും. നേത്ര സംരക്ഷത്തിനു നിങ്ങൾക്ക് 20-20-20 റൂൾ ഉപയോഗിക്കാം. ഇത് കണ്ണിന്റെ ആയാസവും ഡിജിറ്റൽ ഐ സ്ട്രയിനും തടയാൻ ഉപയോഗിക്കാവുന്ന ഒരു ടെക്നിക്കാണ്. ഓരോ 20 മിനിറ്റിലും ഡിജിറ്റൽ സ്‌ക്രീനുകളിൽ നിന്ന് ഇടവേള എടുക്കുകയും 20 സെക്കൻഡ് നേരത്തേക്ക് 20 അടിയെങ്കിലും അകലെയുള്ള ഒരു വസ്തുവിൽ ശ്രദ്ധ കേന്ദ്രീകരിക്കുകയും ചെയ്യുക എന്നതാണ് 20-20-20 റൂൾ.

നിങ്ങളുടെ സ്‌ക്രീൻ ക്രമീകരിക്കുക: നിങ്ങളുടെ സ്‌ക്രീനിന്റെ തെളിച്ചവും (Brightness ) ദൃശ്യതീവ്രതയും(Contrast ) ക്രമീകരിക്കുന്നത് സ്‌ക്രീനിന്റെ തിളക്കം കുറയ്‌ക്കും . ഇത് മൂലം കണ്ണിന്റെ ആയാസവും കുറയും.

കണ്ണിന്റെ ആർദ്രത നിലനിർത്തുന്ന തുള്ളിമരുന്ന് ഉപയോഗിക്കുക: കണ്ണുനീരിന് സമാനമായ ഇത്തരം തുള്ളിമരുന്നുകൾ ഉപയോഗിക്കുന്നത് നിങ്ങളുടെ കണ്ണുകളെ ഈർപ്പമുള്ളതാക്കാനും വരൾച്ച തടയാനും സഹായിക്കും.

കണ്ണട ധരിക്കുക: നീല വെളിച്ചത്തെ തടയുന്ന പ്രത്യേക ഗ്ലാസുകൾ ധരിക്കുന്നത് നീല വെളിച്ചത്തിന്റെ ദോഷകരമായ ഫലങ്ങളിൽ നിന്ന് നിങ്ങളുടെ കണ്ണുകളെ സംരക്ഷിക്കാൻ സഹായിക്കും.

നല്ല ശീലങ്ങൾ പരിശീലിക്കുക: കുറഞ്ഞ സമയം , മതിയായ വെളിച്ചം, ഉറങ്ങുന്നതിന് മുമ്പ് ഡിജിറ്റൽ ഉപകരണങ്ങൾ ഒഴിവാക്കൽ തുടങ്ങിയ നല്ല ശീലങ്ങൾ ശീലമാക്കുന്നത് കണ്ണുകളുടെ ബുദ്ധിമുട്ട് കുറയ്‌ക്കാൻ സഹായിക്കും.സ്മാർട്ട് ഫോണിലെ ബ്ലൂ ലൈറ്റ് ഫിൽട്ടർ ഓണാക്കുന്നത് കണ്ണിന്റെ ആയാസം കുറയ്‌ക്കാൻ സഹായിക്കും. ഒരു ടൈമർ സജ്ജീകരിച്ച് സ്ക്രീനിൽ നിന്ന് 20 മുതൽ 30 മിനിറ്റ് വരെ അവധി എടുക്കുക. ഇതിനായി നിങ്ങളുടെ സ്മാർട്ട് വാച്ച് നല്ല രീതിയിൽ ഉപയോഗിക്കുക.

ഇന്നത്തെ കാലത്ത് ഡിജിറ്റൽ ഉപകരണങ്ങൾ ഉപയോഗിച്ച് ദീർഘനേരം ചെലവഴിക്കുന്ന ആളുകൾക്ക് സ്മാർട്ട്ഫോൺ വിഷൻ സിൻഡ്രോം ഉണ്ടാകാനുള്ള സാധ്യത 100 % ആണ്. കുട്ടികളെയും ഈ രോഗം വെറുതെ വിടില്ല . കൃത്യമായ അവബോധമുണ്ടാക്കുക എന്നതാണ് പ്രതിരോധത്തിന്റെ ഒന്നാം പടി. പ്രതിരോധ നടപടികൾ കൈക്കൊള്ളുകയും നല്ല ശീലങ്ങൾ പരിശീലിക്കുകയും ചെയ്യുന്നതിലൂടെ, നിങ്ങൾക്ക് ഡിജിറ്റൽ ഐ സ്‌ട്രെയിൻ കുറയ്‌ക്കാനും ആരോഗ്യകരമായ കാഴ്ച നിലനിർത്താനും കഴിയും.