തിരുവനന്തപുരം: ദിവസങ്ങളോളം വേദനയും വീക്കവും അനുഭവപ്പെട്ടതിനെ തുടർന്ന് ആശുപത്രിയിലെത്തിയ 58കാരിയുടെ കണ്ണിൽ നിന്നും പുറത്തെടുത്തത് ജീവനുള്ള വിര. തിരുവനന്തപുരത്തെ സ്വകാര്യ ആശുപത്രിയിൽ നടന്ന എൻഡോസ്കോപ്പിയിലൂടെയാണ് 11 സെ. മീ നീളമുള്ള വിരയെ പുറത്തെടുത്തത്. ഇവരുടെ കണ്ണുകളെ ചലിപ്പിക്കുന്ന പേശികളിലാണ് വിരയെ കണ്ടെത്തിയത്.
രോഗിയുടെ വലതു കണ്ണിൽ ദിവസങ്ങളായി വേദനയും വീക്കവുമടക്കമുള്ള അസ്വസ്ഥതകൾ പ്രകടമായതോടെ ഇഎൻടി വിഭാഗത്തിലെത്തി പരിശോധന നടത്തിയിരുന്നു. കണ്ണിന് ചുറ്റും പഴുപ്പ് കെട്ടികിടക്കുന്നതായി ശ്രദ്ധയിൽപ്പെട്ടതിന് പിന്നാലെ അൾട്രാ സൗണ്ട് സ്കാനും ചെയ്തു. ഇതോടെ കണ്ണിനുള്ളിൽ ജീവനുള്ള വിരയുടെ സാന്നിദ്ധ്യം കണ്ടെത്തുകയായിരുന്നു. രണ്ട് മണിക്കൂർ നീണ്ട ശസ്ത്രക്രിയയിലൂടെയായിരുന്നു വിരയെ പുറത്തെടുത്തത്.
വളർത്തു മൃഗങ്ങളിൽ കാണപ്പെടുന്ന ‘ഡയറോഫിലാരിയ’ എന്നയിനം വിരയെയാണ് രോഗിയുടെ കണ്ണിൽ നിന്ന് കണ്ടെത്തിയത്. ഇവ മനുഷ്യ ശരീരത്തിൽ കൊതുകുകളിലൂടെയാണ് എത്തുന്നത്. സാധാരണയായി ശരീരത്തിനുള്ളിലെത്തിയാൽ നശിക്കുന്ന ഇത്തരം വിരകൾ അപൂർവം സംഭവങ്ങളിൽ കണ്ണുകൾക്ക് ചുറ്റുമുള്ള ത്വക്കിനടിയിൽ ജീവനോടെ കാണപ്പെടാറുണ്ട്.
Comments