നല്ല വെളുത്ത പല്ലുകളെ മുല്ലമൊട്ട് പോലെയുള്ള പല്ലുകളെന്ന് പലരും വിശേഷിപ്പിക്കാറുണ്ട്. എല്ലാവരും ഇത്തരത്തിലുള്ള വെളുത്ത പല്ലുകൾ ആഗ്രഹിക്കുന്നവരാണെങ്കിലും പലർക്കും ഇത് കിട്ടാറില്ല. ചിലരുടെ പല്ലുകൾ വളരെയധികം സെൻസിറ്റീവായിരിക്കും എന്നതിനാൽ വളരെ പെട്ടെന്ന് മഞ്ഞക്കറ പറ്റി പിടിക്കും. ഇതിന് പ്രധാന കാരണങ്ങളിലൊന്നാണ് ചായയും കാപ്പിയും.
പല്ലിൽ എപ്പോഴും മഞ്ഞക്കറ പറ്റുന്നുവെന്ന് വിഷമിക്കുന്നവർ ആദ്യം ഒഴിവാക്കേണ്ടത് ചായയും കാപ്പിയുമാണെന്ന് പറയുന്നതിന് കാരണവും ഇതുതന്നെയാണ്. സെൻസിറ്റീവായ പല്ലുള്ളവർക്ക് ഇത്തരം പാനീയങ്ങളുടെ കറ പെട്ടെന്ന് കയറിപിടിക്കും. ചായയും കാപ്പിയും എത്രമാത്രം കടുപ്പമേറിയതാണോ അത്രമാത്രം കടുപ്പത്തിലായിരിക്കും പല്ലിൽ കറയും പറ്റിപ്പിടിക്കുന്നത്. വൈൻ കുടിക്കുന്നതും ചിലരുടെ പല്ലുകളിൽ നിറം മാറ്റത്തിന് കാരണമാകാറുണ്ട്.
ചായ/കോഫി കറ പല്ലിലെ ഇനാമലിലാണ് കയറിപ്പിടിക്കുക. പാനീയത്തിലെ ടാന്നീസ് എന്ന ഘടകമാണ് ഇതിന് കാരണമാകുന്നത്. ഇത് പല്ലിൽ പിടിച്ചിരിക്കുകയും പല്ലിന് നിറവ്യത്യാസം വരുത്തുകയും ചെയ്യും. എന്നാൽ ഇതൊഴിവാക്കാൻ നിങ്ങൾ ചായയും കാപ്പിയും കുടിക്കുന്നത് നിർത്തണമെന്നില്ല. പകരം ചില സൂത്രവിദ്യകൾ പയറ്റിയാൽ മതി.
ചായ/കാപ്പി എന്നിവ കുടിക്കുമ്പോൾ കഴിവതും പാൽ ചേർക്കുക. കട്ടൻ ചായയും കട്ടൻ കാപ്പിയും കഴിവതും ഒഴിവാക്കാം..
ചായ/കാപ്പി കുടിക്കാൻ സ്ട്രോ ഉപയോഗിക്കുക. ഇതാകുമ്പോൾ പല്ലുമായി നേരിട്ടുള്ള സമ്പർക്കം ഒഴിവാകും. നിങ്ങൾക്ക് വേണ്ടുവോളം കുടിക്കുകയും ചെയ്യാം..
ചായ/കാപ്പി കുടിച്ചതിന് ശേഷം വായിൽ വെള്ളമെടുത്ത് നല്ലപോലെ കുലുക്കി തുപ്പിക്കളയുക. വായ കഴുകാൻ വൈകും തോറും പല്ലിൽ കറ പിടിക്കാനുള്ള സാധ്യത കൂടുതലാണെന്ന് ഓർക്കുക.
കടുപ്പം കുറച്ച് ചായ/കാപ്പി ഉണ്ടാക്കി കുടിക്കുന്നതും കറ പിടിക്കാതിരിക്കാൻ സഹായിക്കും.
