ചൊറിച്ചിൽ ആർക്കാണ് സഹിക്കാൻ കഴിയുക. ചൊറിച്ചിൽ ഉണ്ടാക്കുന്ന ചുവന്ന കുരുക്കൾ മൂലമോ അല്ലെങ്കിൽ ചർമ്മത്തിലെ തടിപ്പു മൂലമോ ബുദ്ധിമുട്ട് അനുഭവിക്കുന്നവരാണോ നിങ്ങൾ? മറ്റെന്തെങ്കിലും പ്രത്യേകിച്ച് ഒരു കാരണമില്ലാതെയാണ് ചൊറിച്ചിൽ ഉണ്ടാകുന്നതെങ്കിൽ അത് അലർജി മൂലമാകും. സാധാരണഗതിയിൽ ചർമ്മത്തെ ബാധിക്കുന്ന അലർജികൾ ഏതൊക്കെയാണെന്നും അതിന് എന്താണ് പരിഹാര മാർഗങ്ങളെന്നും നോക്കാം.
എക്സിമ
കുട്ടികളിലും മുതിർന്നവരിലും കണ്ടുവരുന്ന പ്രശ്നമാണിത്. ചുവന്ന നിറത്തിലുള്ളതും ശൽക്കങ്ങളോടു കൂടിയതുമായ ചൊറിച്ചിൽ ഉണ്ടാക്കുന്ന തടിപ്പുകളായാണ് ഇവ കാണപ്പെടുന്നത്. സാധാരണയായി, മുഖം, കാൽമുട്ടുകൾ, കൈമുട്ടുകൾ, തലയോട്ടി എന്നിവടങ്ങളിലാണ് ഇവ പ്രത്യക്ഷപ്പെടുന്നത്. ആഹാരം, മാനസിക സംഘർഷം, വളർത്തുമൃഗങ്ങളുമായുള്ള സമ്പർക്കം എന്നിവ ഇതിന് കാരണമാകാം.
ഹൈവ്സ്
ചൊറിച്ചിലോടു കൂടി ചർമ്മം ചുവന്നു തടിക്കുന്ന അവസ്ഥയാണിത്. ആഹാരം, മരുന്ന്, ലാറ്റെക്സ്, ചർമ്മത്തിൽ ഉരസുന്നത്, സൂര്യപ്രകാശം തുടങ്ങിയവ പ്രേരകങ്ങളാവാം.
കോണ്ടാക്റ്റ് ഡെർമാറ്റൈറ്റിസ്
ചില വസ്തുക്കളോടുള്ള ചർമ്മത്തിന്റെ പ്രതികരണമാണിത്. ചുവപ്പു നിറത്തിലുള്ളതും ചൊറിച്ചിൽ ഉണ്ടാക്കുന്നതുമായ കുമിളകളായാണിവ പ്രത്യക്ഷപ്പെടുന്നത്. മിക്കപ്പോഴും വേദനയുണ്ടായിരിക്കുകയും ചെയ്യും. പെർഫ്യൂമുകൾ, ലാറ്റെക്സ്, ഡൈകൾ അല്ലെങ്കിൽ സൗന്ദര്യവർദ്ധക സാമഗ്രികൾ തുടങ്ങിയവയുമായി സമ്പർക്കത്തിൽ ഏർപ്പെടുന്നത് ഇതിനു കാരണമാകാം.
ചർമ്മ അലർജികളെ നേരിടാനുള്ള വഴികൾ
മോയിസ്ചറൈസ്: ചർമ്മം ഈർപ്പമുള്ളതാക്കി നിലനിർത്തുന്നത് തടിപ്പുകൾ ഭേദമാവാൻ സഹായിക്കും. കുളി കഴിഞ്ഞ ശേഷം മോയിസ്ചറൈസിംഗ് ക്രീം പുരട്ടാൻ മറക്കരുത്.
ഉരച്ചു കഴുകൽ: അലർജിയുണ്ടാക്കുന്ന ഏതെങ്കിലും ഒരു വസ്തുവുമായി സമ്പർക്കത്തിൽ ഏർപ്പെട്ടിട്ടുണ്ടെങ്കിൽ സോപ്പും വെള്ളവുമുപയോഗിച്ച് ചർമ്മം നന്നായി ഉരച്ചു കഴുകുന്നത് നല്ലതാണ്.
കോൾഡ് കമ്പ്രസ്: സാധാരണ തടിപ്പുകൾ ഇല്ലാതാക്കാൻ ബുദ്ധിമുട്ട് അനുഭവിക്കുന്ന ചർമ്മ ഭാഗം കോൾഡ് കമ്പ്രസിലൂടെ തണുപ്പിക്കുന്നത് സഹായിക്കും.
തണുത്ത വെള്ളത്തിലെ കുളി: തണുത്ത വെള്ളത്തിൽ കുളിച്ച ശേഷം ശരീരം തുടച്ച് വൃത്തിയാക്കുകയും മോയിസ്ചറൈസർ പുരട്ടുകയും ചെയ്യുക.
കട്ടിയില്ലാത്ത അയഞ്ഞ വസ്ത്രങ്ങൾ: ലളിതവും അയഞ്ഞതുമായ വസ്ത്രങ്ങൾ ധരിക്കുന്നത് ചർമ്മത്തിനുണ്ടാവുന്ന അലർജിയെ നിയന്ത്രിക്കാൻ സഹായിക്കും.
ഒടിസി മരുന്നുകൾ: ചർമ്മത്തിൽ പ്രശ്നങ്ങളുള്ള സ്ഥലത്ത് കലാമിൻ ലോഷൻ അല്ലെങ്കിൽ ഒടിസി – ഹൈഡ്രോകോർട്ടിസോൺ ക്രീം പുരട്ടുക.
ചർമ്മത്തിലെ അലർജി മാറ്റമില്ലാതെ തുടരുകയാണെങ്കിലോ മുകളിൽ പറഞ്ഞ വഴികൾ ഫലപ്രദമായി തോന്നുന്നില്ല എങ്കിലോ ഉടൻ ഡോക്ടറുടെ ഉപദേശം തേടേണ്ടതാണ്. ഇത് ചർമ്മസംബന്ധമായ മറ്റെന്തെങ്കിലും ഗുരുതരമായ സാഹചര്യമാകാൻ സാധ്യതയുണ്ട്.
