ആഡംബരം നിറഞ്ഞ മിനി കൂപ്പർ സ്വന്തമാക്കാൻ പലർക്കും ആഗ്രഹമുണ്ട് . എങ്കിലും സാധാരണക്കാർക്കൊന്നും സ്വന്തമാക്കാൻ പറ്റുന്നതല്ല ഈ വമ്പനെ . മിനി കൂപ്പർ സ്വന്തമാക്കുന്നവർ അതിന്റെ ലഘു ചരിത്രം കൂടി അറിയുന്നത് നന്നാകും .
ചാള്സ് കൂപ്പറും മകന് ജോണ് കൂപ്പറും ചേര്ന്ന് 1947ല് ബ്രിട്ടനില് സ്ഥാപിച്ചതാണ് കൂപ്പര് കാര് കമ്പനി. ജോണ് കൂപ്പര് കമ്പനി ഉടമ എന്നതിന് പുറമെ കാറോട്ടത്തില് കമ്പമുള്ളയാളും ആയിരുന്നു . രണ്ടാം ലോകമഹായുദ്ധത്തിന് ശേഷം സൂയസ് കനാലിലൂടെയുള്ള ചരക്ക് ഗതാഗതത്തിന്റെ പകുതിയും പെട്രോളിയമായിരുന്നു.
ഫ്രഞ്ച്- ബ്രിട്ടീഷ് കമ്പനികളായിരുന്നു സൂയസ് കമ്പനി എന്ന പേരില് കനാലിലെ ഗതാഗതത്തിന്റെ കുത്തക. ഈജിപ്തിലെ നാസര് കനാല് കമ്പനി ദേശസാത്ക്കരിച്ചതോടെ ബ്രിട്ടന് പെട്ടു. ബ്രിട്ടണില് ഇന്ധന വില കുതിച്ചു കയറി. എണ്ണകുടിയന് വമ്പന് കാറുകളെ ജനം കൈവിട്ടു തുടങ്ങിയ കാലമായിരുന്നു 1950 കളുടെ രണ്ടാം പകുതി.
കാര് വില്പ്പന കൂട്ടാന് എന്താണ് വഴിയെന്ന് ബ്രിട്ടീഷ് മോട്ടോര് കോര്പ്പറേഷന്റെ തലവന് ലിയോനാര്ഡ് പെര്സി ലോര്ഡ് തല പുകച്ചു. കമ്പനിയുടെ ആസ്ഥാന കാര് രൂപകല്പ്പനാ വിദഗ്ധന് അലക് ഇസിയോനിസിനെ വിളിച്ചു. പുതിയൊരു വണ്ടി ഡിസൈന് ചെയ്യണം. വണ്ടി ചെറുതായിരിക്കണം. എന്നാല് നാല് പേരെ ഉള്ക്കൊള്ളണം. നല്ല ഇന്ധനക്ഷമതയുള്ളതാവണം. ഇതായിരുന്നു ആവശ്യം.
ബി എം സി ഉടമയുടെ വെല്ലുവിളി ഇസിയോനിസ് ഏറ്റെടുത്തു. നിരവധി സ്ക്കെച്ചുകള് തയ്യാറാക്കി. വരച്ചും തിരുത്തിയും രൂപകല്പ്പന മുന്നേറി. അങ്ങനെ മിനിയുടെ ആദ്യ രൂപം 1959 ആഗസ്റ്റില് പുറത്തിറങ്ങി. ആദ്യം മോറിസ് മിനി മൈനര് എന്നും ഓസ്റ്റിന് സെവന് എന്നുമെല്ലാം അറിയപ്പെട്ടിരുന്ന ഈ വാഹനം പിന്നീട് മിനി എന്ന പേരില് മാത്രം അറിയപ്പെടാന് തുടങ്ങി. പിന്നെയുള്ളത് ചരിത്രമാണ്. മിനി എന്ന കാര് ബ്രിട്ടന്റെ ചരിത്രത്തില് തന്നെ ഏറ്റവും വില്പ്പനയുള്ള കാറായി മാറി. ബി എം സി ഉടമ ലിയോനാര്ഡ് ലോഡിനെയും ഡിസൈനര് ഇസിയോനിസിനെയും തേടി വിഖ്യാതമായ പുരസ്ക്കാരങ്ങള് എത്തി.
മിനിക്ക് ഒരു റേസിംഗ് കാര് പതിപ്പ് വേണമെന്നത് ജോണിന്റെ ആശയമായിരുന്നു. അങ്ങനെ മിനിയെ കൂപ്പര് കമ്പനി ഏറ്റെടുത്തു. 1961ല് മിനി കൂപ്പര് 997 എന്ന മോഡല് പുറത്തിറങ്ങി. നമ്മള് ഇന്ന് കാണുന്ന മിനി കൂപ്പറിന്റെ ആദ്യ രൂപം അതാണ്. 2000ല് മിനി കൂപ്പറെ ബി എം ഡബ്ല്യു കമ്പനി ഏറ്റെടുത്തു. ഇന്ന് നിരത്തിലുള്ള മിനി കൂപ്പറുകള് ബി എം ഡബ്ല്യു ഇറക്കുന്നതാണ്.
മിനി കൂപ്പറെ വേറിട്ട് നിര്ത്തുന്നത് അതിന്റെ രൂപം തന്നെയാണ്. ഇതിന്റെ ശില്പ്പ ഇസിയോനിസ് കാര് രൂപകല്പ്പനയുടെ ഗ്രീക്ക് ദേവന് എന്നാണത്രെ അറിയപ്പെട്ടത്. മിനിയെക്കാള് തനിക്ക് ഇഷ്ടപ്പെട്ട തന്റെ സ്വന്തം സൃഷ്ടി മോറിസ് മൈനര് എന്നാണ് ഇസിയോനിസ് പറഞ്ഞിട്ടുള്ളത്. ആദ്യകാലത്ത് ഓക്സ്ഫഡിലും ബിര്മിംഗ്ഹാമിലും ആയിരുന്നു മിനിയുടെ ഉല്പ്പാദനം.
