കാസർകോട്: പെരുമ്പാമ്പ് വിഴുങ്ങിയ കോഴികൾക്ക് നഷ്ടപരിഹാരം തേടി കർഷകൻ. കാസർകോട് വെള്ളരിക്കുണ്ട് താലൂക്ക് തല അദാലത്തിനെത്തിയ മന്ത്രി അഹമ്മദ് ദേവർകോവിലിന് മുന്നിലാണ് കർഷകൻ പരാതിയുമായെത്തിയത്. പാമ്പ് സർക്കാരിന്റെതാണേങ്കിൽ കോഴികൾ എന്റേതാണ്. നഷ്ടപരിഹാരം കിട്ടണമെന്നാണ് കർഷകനായ കെവി ജോർജിന്റെ നിലപാട്. കഴിഞ്ഞ ഒരു വർഷമായി നഷ്ടപരിഹാരത്തിനായി അലയുകയാണ് ജോർജ്.
2022 ജൂണിലാണ് പെരുമ്പാമ്പ് ജോർജിന്റെ വീട്ടിലുണ്ടായിരുന്ന കോഴിക്കൂട്ടിൽ കയറി കോഴികളെ ഒന്നാകെ വിഴുങ്ങിയത്. കോഴികൾ മുഴുവൻ നഷ്ടപ്പെട്ടതോടെ ജോർജ് പ്രതിസന്ധിയിലായി. അതോടെ പാമ്പ് വിഴുങ്ങിയ കോഴികളുടെ നഷ്ടപരിഹാരം വേണമെന്നാവശ്യപ്പെട്ട് ജോർജ് വനം വകുപ്പ് അധികൃതരെ സമീപിക്കുകയായിരുന്നു. പല തവണ ശ്രമിച്ചിട്ടും തീരുമാനമാകാതിനെ തുടർന്നാണ് അദാലത്തിൽ മന്ത്രിയെ കാണാനെത്തിയത്.
അദാലത്ത് നടക്കുന്ന വെള്ളരിക്കുണ്ടിലെത്തി മന്ത്രി അഹമ്മദ് ദേവർകോലിലിനെയും കളക്ടറെയും സബ്കളക്ടറെയും കണ്ട് കാര്യം അവതരിപ്പിച്ചു. ഇത് കേട്ട് കുറേ നേരം തലപ്പുകച്ചെങ്കിലും അനുകൂല മറുപടി ലഭിച്ചിട്ടില്ല. പരിശോധിച്ച് വേണ്ടത് ചെയ്യാമെന്ന് മാത്രമാണ് മന്ത്രി പറഞ്ഞത്.
