മിഥുന മാസത്തിലെ പൗർണമി നാളിൽ സ്ത്രീകൾ അനുഷ്ഠിക്കുന്ന വ്രതമാണ് വടസാവിത്രി വ്രതം. വടവൃക്ഷമെന്നാൽ ആൽമരം. ആൽമരവുമായി ബന്ധപ്പെട്ട് അനുഷ്ഠിക്കുന്ന വ്രതമായതിനാലാണ് ഇത്തരത്തിൽ പേര് വന്നത്. ദാമ്പത്യ ക്ലേശം നീങ്ങാനും ഭർതൃസൗഖ്യത്തിനും ദീർഘസുമംഗലീ ഭാഗ്യത്തിനും അനുഷ്ഠിക്കുന്ന കാമ്യവ്രതമാണ് ഇത്. പ്രത്യേക അഭീഷ്ടസിദ്ധിയ്ക്കായി അനുഷ്ഠിക്കുന്ന വ്രതമാണ് കാമ്യവ്രതം.
വടക്കേ ഇന്ത്യയിൽ പൊതുവേ വടസാവിത്രി പൂർണിമ അല്ലെങ്കിൽ വടപൂർണിമ എന്നാണ് ഇതറിയപ്പെടുന്നത്. വിവാഹിതരായ സ്ത്രീകൾ മാത്രമാണ് ഈ വ്രതം ആചരിക്കുന്നത്. പൗർണമി ദിനത്തിൽ സൂര്യോദയത്തിന് മുൻപ് കുളിച്ച് കുറി തൊട്ട് നിലവിളക്ക് കത്തിച്ച് ഇഷ്ടദേവനെ പ്രാർത്ഥിക്കുക. സമീപത്തോ അടുത്തുള്ള ക്ഷേത്രത്തിലോ ഉള്ള ആൽമരത്തിന് വലം വെയ്ക്കണം. ചുവട്ടിൽ തൊഴുത് പ്രാർത്ഥിച്ചതിന് ശേഷമാകണം പ്രദക്ഷിണം. പുരുഷന്മാരും ആൽമരത്തെ ഏഴ് തവണ പ്രദക്ഷിണം ചെയ്താൽ കുടുംബത്തിൽ ഐശ്വര്യം ഉണ്ടാകുമെന്നാണ് വിശ്വാസം. മത്സ്യമാംസാദികൾ ഒഴിവാക്കി ഈശ്വരചിന്തയോടെ ആയിരിക്കണം വ്രതം.
ആൽമരത്തെ പ്രദക്ഷിണം ചെയ്യുമ്പോൾ
‘മൂലതോ ബ്രഹമരൂപായ
മദ്ധ്യതോ വിഷ്ണുരൂപിണേ
അഗ്രതഃ ശിവരൂപായ
വൃക്ഷരാജായ തേ നമഃ’
എന്ന മന്ത്രം ജപിക്കേണ്ടതാണ്.
കടയ്ക്കൽ ബ്രഹ്മാവിന്റെ രൂപത്തിലും നടുവിൽ വിഷ്ണുവിന്റെ രൂപത്തിലും അറ്റത്ത് ശിവന്റെ രൂപത്തിലുമുള്ള വൃക്ഷരാജന് നമസ്കാരം എന്നാണ് മന്ത്രം കൊണ്ട് അർത്ഥമാക്കുന്നത്.
ആൽമരത്തിന് ഏഴ് തവണ പ്രദക്ഷിണം വെയ്ക്കുന്നതിനൊപ്പം മരത്തെ നൂല് കൊണ്ട് ചുറ്റുന്ന പതിവും ചിലയിടങ്ങളിലുണ്ട്. വിവാഹിതരായ സ്ത്രീകൾ ആൽമരത്തിൽ ഇത്തരത്തിൽ നൂൽ കെട്ടി പ്രാർത്ഥിക്കുകയും അർച്ചന നടത്തുകയും ചെയ്താൽ ദീർഘസുമംഗലി ആയിരിക്കുമെന്നാണ് വിശ്വാസം. ഭർത്താവിന്റെ ആയുസിനായി ഉപവാസത്തോടെ വ്രതം അനുഷ്ഠിക്കുന്നവരുമുണ്ട്. കേരളത്തിലും ധാരാളമായി ഈ വ്രതം അനുഷ്ഠിച്ച് വരുന്നു.
പഞ്ചാംഗം അനുസരിച്ച്, ജ്യേഷ്ഠ മാസത്തിലെ പൗർണ്ണമി 2023 ജൂൺ 03 ന് അനിഴം നക്ഷത്രം രാവിലെ 11.17 ന് ആരംഭിക്കുകയും പൗർണ്ണമി തീയതി 04 ജൂൺ 2023 ന് കേട്ട നക്ഷത്രം രാവിലെ 09.12 ന് അവസാനിക്കുകയും ചെയ്യും.
