തിരുവനന്തപുരം: കേരളത്തിലെ റെയിൽ യാത്രക്കാർക്ക് ആശ്വാസവും സന്തോഷവും പകരുന്ന സുപ്രധാന തീരുമാനവുമായി ഇന്ത്യൻ റെയിൽവേ. കേരളത്തിലൂടെ സർവീസ് നടത്തുന്ന പാലരുവി എക്സ്പ്രസും മധുര–ഗുരുവായൂർ എക്സ്പ്രസും ഇനി മുതൽ അത്യാധുനിക LHB (Linke Hofmann Busch) കോച്ചുകളിലേക്ക് മാറും. നിലവിലെ ഐസിഎഫ് കോച്ചുകൾക്ക് പകരമായാണ് ജർമൻ സാങ്കേതികവിദ്യയിൽ വികസിപ്പിച്ച സുരക്ഷിതവും കൂടുതൽ സൗകര്യപ്രദവുമായ കോച്ചുകൾ എത്തുന്നത്.
അപകടസമയങ്ങളിൽ കോച്ചുകൾ പരസ്പരം ഒന്നിനുള്ളിലേക്ക് ഒന്നായി കയറുന്നത് തടയുന്ന ആന്റി-ടെലിസ്കോപ്പിക് സംവിധാനം, കൂടുതൽ കാര്യക്ഷമമായ ഡിസ്‌ക് ബ്രേക്ക്, യാത്രക്കാർക്ക് കൂടുതൽ ലെഗ് സ്പേസ് എന്നിവയാണ് LHB കോച്ചുകളുടെ പ്രധാന സവിശേഷതകൾ. ഉയർന്ന വേഗതയിലും മികച്ച സ്ഥിരതയും യാത്രാസുഖവും ഈ കോച്ചുകൾ ഉറപ്പുനൽകും.
തൂത്തുക്കുടി–പാലക്കാട് പാലരുവി എക്സ്പ്രസ് ജൂലൈ 20 മുതൽ തൂത്തുക്കുടിയിൽ നിന്നും ജൂലൈ 21 മുതൽ പാലക്കാട്ടിൽ നിന്നും LHB കോച്ചുകളോടെ സർവീസ് ആരംഭിക്കും. അതേസമയം, മധുര–ഗുരുവായൂർ എക്സ്പ്രസ് ജൂലൈ 26 മുതൽ മധുരയിൽ നിന്നും ജൂലൈ 27 മുതൽ ഗുരുവായൂരിൽ നിന്നും പുതിയ LHB കോച്ചുകൾ ഉപയോഗിച്ച് സർവീസ് നടത്തും.
കേരളത്തിലൂടെ സർവീസ് നടത്തുന്ന പ്രധാന ട്രെയിനുകളെ ഘട്ടംഘട്ടമായി ആധുനിക കോച്ചുകളിലേക്ക് മാറ്റുന്ന റെയിൽവേയുടെ നവീകരണ പദ്ധതിയിലെ മറ്റൊരു സുപ്രധാന ചുവടുവെപ്പായാണ് ഈ തീരുമാനം വിലയിരുത്തപ്പെടുന്നത്.
