മലയാള സിനിമകളുടെ തലക്കെട്ടുകൾ രൂപപ്പെടുന്നതിന് പിന്നിലെ കഥകളടങ്ങുന്ന അനൂപ് രാമകൃഷ്ണന്റെ പുസ്തകം പരിചയപ്പെടുത്തി മോഹൻലാൽ. വിഷ്വൽ ഡിസൈനറായ അനൂപ് രാമകൃഷ്ണന്റെ പുസ്തകമായ ടൈറ്റിൽ-ഒ-ഗ്രഫിയുടെ പ്രകാശനം നടത്തി മോഹൻലാൽ.മലയാള സിനിമകളുടെ തലക്കെട്ടുകളെക്കുറിച്ചുള്ള പുസ്തകമാണിത്. അകാലത്തിൽ മരണമടഞ്ഞ പ്രിയ സുഹൃത്തിന് വേണ്ടിയുള്ള സമർപ്പണമായി മോഹൻലാൽ തന്റെ ഫേസ്ബുക്ക് പേജിലൂടെ പുസ്തകം ആരാധകർക്ക് മുന്നിൽ അവതരിപ്പിക്കുകയായിരുന്നു.
‘ഒരു സിനിമയെക്കുറിച്ച് ചിന്തിക്കുമ്പോൾ ആദ്യം മനസിലേക്ക് ഓടിയെത്തുന്നത് അതിന്റെ ടൈറ്റിൽ ആയിരിക്കും, അല്ലേ. ശില്പസൗന്ദര്യം പോലെ നമ്മുടെയൊക്കെ മനസിൽ പതിഞ്ഞുകിടക്കുന്ന എത്രയെത്ര സിനിമ ടൈറ്റിലുകളാണുള്ളത്. അകാലത്തിൽ വിട്ടുപിരിഞ്ഞ എന്റെ പ്രിയ സുഹൃത്ത് അനൂപിന്റെ സ്വപ്നമായിരുന്നു മലയാളസിനിമയിലെ ടൈറ്റിലുകളുടെ പകർന്നാട്ടങ്ങളെ കുറിച്ചുള്ള ഒരു സമഗ്ര പുസ്തകം. ആ സ്വപ്നത്തിന്റെ സാക്ഷാൽക്കാരമാണ് ‘ടൈറ്റിൽ-ഒ-ഗ്രഫി’.
ടൈറ്റിലോഗ്രാഫി എന്ന സമാനതകളില്ലാത്ത ഈ പുസ്തകത്തിലൂടെ അനൂപ് സിനിമാ തലക്കെട്ടുകളുടെ പിന്നിലെ അത്ഭുതലോകം നമുക്ക് മുന്നിൽ തുറന്നിടുകയാണ്. ഇന്ന് നമുക്കൊപ്പമില്ലാത്ത അനൂപിനെ ഹൃദയത്തോട് ചേർത്തുനിർത്തി ഏറെ സന്തോഷത്തോടെയും അഭിമാനത്തോടെയും ഈ പുസ്തകം മലയാളത്തിന് സമർപ്പിക്കുന്നു.’ എന്ന അടിക്കുറിപ്പോടു കൂടിയാണ് മോഹൻലാൽ പുസ്തകം പിടിച്ചു നിൽക്കുന്ന ചിത്രം പങ്കുവെച്ചത്.
പ്രമുഖ വിഷ്വൽ ഡിസൈനറും മൈൻഡ് വേ ഡിസൈനിന്റെ ഡയറക്ടറും ചീഫ് ക്രിയേറ്റീവ് ഓഫീസറുമായിരുന്ന അനൂപ് രാമകൃഷ്ണൻ 2021 ഡിസംബറിലായിരുന്നു അന്തരിച്ചത്. സിനിമയിൽ വളരെയധികം താൽപര്യമുണ്ടായിരുന്ന വ്യക്തിയായിരുന്നു അദ്ദേഹം. മോഹൻലാൽ അവതരിപ്പിച്ച വ്യത്യസ്ത കഥാപാത്രങ്ങളുടെ ദൃശ്യവിഷ്കാരമായ ‘വേഷങ്ങൾ’ എന്ന മൊബൈൽ ആപ്ലിക്കേഷൻ അവതരിപ്പിച്ചത് അനൂപ് രാമകൃഷ്ണനായിരുന്നു. ആപ്ലിക്കേഷന് മികച്ച പ്രതികരണമായിരുന്നു അന്ന് ആരാധകരിൽ നിന്നും ലഭിച്ചത്. മലയാളത്തിന്റെ പ്രിയപ്പെട്ട എഴുത്തുകാരനായ എംടി വാസുദേവൻ നായരുടെ സർഗാത്മക-സിനിമാ ജീവിതം വിവരിക്കുന്ന ‘എംടി അനുഭവങ്ങളുടെ പുസ്തകം’ എന്ന ചിത്രം എഡിറ്റ് ചെയ്തിരുന്നതും അനൂപായിരുന്നു.
