വാഹനലോകത്തെ അമ്പരിപ്പിക്കുന്ന പ്രഖ്യാപനവുമായി ലോകത്തെ ഒന്നാംനിര കാർ കമ്പനിയായ ടൊയോട്ട. തങ്ങളുടെ ഭാവിയിലെ വൈദ്യുത വാഹനങ്ങൾക്ക് ഒറ്റ ചാർജിൽ 1,000 കിലോമീറ്റർ വരെ സഞ്ചാരിക്കാനാവുമെന്ന പ്രഖ്യാപനവുമായാണ് ടൊയോട്ട എത്തുന്നത്. പത്ത് മിനിറ്റിനുള്ളിൽ വാഹനം ചാർജ് ചെയ്യാൻ സാധിക്കുമെന്നും ടൊയോട്ട പറയുന്നു. മെഴ്സിഡീസ്, ബിഎംഡബ്ല്യു, ടെസ്ല തുടങ്ങിയ വൈദ്യുത വാഹന നിർമാണ രംഗത്തെ അതികായർ പോലും പരമാവധി 600- 700 കിലോമീറ്റർ റേഞ്ച് നൽകുമ്പോഴാണ് ടൊയോട്ടയുടെ ഈ സുപ്രധാന പ്രഖ്യാപനം.
അടുത്ത തലമുറ ബാറ്ററികളും സോണിക് സാങ്കേതികവിദ്യയും ഉപയോഗിച്ചാണ് ഇത്രയും റേഞ്ച് സാധ്യമാക്കിയതെന്നാണ് ടൊയോട്ട അറിയിക്കുന്നത്. ആയിരം കിലോമീറ്റർ മൈലേജുള്ള ഇവി 2026-ൽ പുറത്തിറക്കുമെന്നാണ് ടെയോട്ടയുടെ പ്രഖ്യാപനം. ലിഥിയം അയേൺ ബാറ്ററികളേക്കാളും ഊർജ്ജ കാര്യക്ഷമതയും കുറഞ്ഞ ചാർജിങ് സമയവുമുള്ള സോളിഡ് ബാറ്ററികളാണ് ടൊയോട്ട നിർമിക്കുക. ഇത്തരം സോളിഡ് സ്റ്റേറ്റ് ബാറ്ററികളിൽ ഓടുന്ന വാഹനങ്ങൾ 2028-നുള്ളിൽ പുറത്തിറക്കുമെന്നും കമ്പനി പറയുന്നു.
ടൊയോട്ടയുടെ ബിഇവി ഫാക്ടറിയിലായിരിക്കും പുതിയ ബാറ്ററികൾ നിർമിക്കുക. മെയ് മാസത്തിൽ പ്രവർത്തനം ആരംഭിച്ച ഫാക്ടറിയിൽ 2030 ആകുമ്പോഴേക്കും 17 ലക്ഷം വാഹനങ്ങൾ പ്രതിവർഷം നിർമിക്കാനാവുമെന്നാണ് ടൊയോട്ടയുടെ കണക്കുകൂട്ടൽ. 2026 ആകുമ്പോഴേക്കും 15 ലക്ഷം വൈദ്യുത വാഹനങ്ങൾ വിൽക്കാനാവുമെന്നും ടൊയോട്ട കരുതുന്നു. കാർ നിർമാണത്തിന് ജിഗാ കാസ്റ്റിങ് സാങ്കേതിക വിദ്യ ഉപയോഗിക്കുമെന്നും ടൊയോട്ട അറിയിച്ചിട്ടുണ്ട്.
