അബുദാബി: ശിലായുഗത്തിലെ മനുഷ്യവാസത്തിന് തെളിവായി അബുദാബിയിൽ നിന്ന് പുരാവസ്തുക്കൾ കണ്ടെടുത്തു. ബി.സി 300 നും എ.ഡി 300 നും ഇടയിലുള്ള സെമിത്തേരിയുടെ ഒരു ഭാഗമാണ് ഖനനത്തിനിടെ കണ്ടെത്തിയത്. അൽഐൻ ഷാബിയ മേഖലയിൽ റോഡുകളും അടിസ്ഥാന സൗകര്യങ്ങളും നവീകരിക്കുന്നതിനിടെയാണ് കണ്ടെത്തൽ.
20 ശവക്കല്ലറകളും കേടുകൂടാത്ത കണ്ടെയ്നർ, സെറാമിക്സ്, വെങ്കല പാത്രങ്ങൾ, ഗ്ലാസ്, പാത്രങ്ങൾ എന്നിവയാണ് കണ്ടെടുത്ത പുരാവസ്തുക്കൾ. ഇതു കൂടാതെ അമ്പ്, കുന്തം, ഇരുമ്പ് ആയുധങ്ങളും കണ്ടെടുത്തു. അൽഖറൈസ് പ്രദേശത്ത് നിന്നും കൂടുതൽ പുരാവസ്തുക്കൾ കണ്ടെത്തിയിട്ടുണ്ട്.
