ലോകം മുഴുവൻ ഓംകാരം മുഴങ്ങി; ചരിത്ര നിമിഷത്തിന് സാക്ഷ്യം വഹിച്ച് യുഎൻ ആസ്ഥാനം; പ്രധാനമന്ത്രിക്കൊപ്പം യോ​ഗ ചെയ്ത് ലോകം

ന്യൂയോർക്ക്: ചരിത്രമെഴുതി പ്രധാനമന്ത്രി നരേന്ദ്രമോദി. 9-ാമത് അന്താരാഷ്‌ട്ര യോഗാ ദിനാചരണത്തിന്റെ ഭാ​ഗമായി ഐക്യരാഷ്‌ട്രസഭ ആസ്ഥാനത്ത് നടന്ന യോ​ഗ സെഷൻ പ്രധാനമന്ത്രി നരേന്ദ്രമോദി നയിച്ചു. യോ​ഗയുടെ ഉത്ഭവം ഇന്ത്യയിലാണെന്നും ഭാരതത്തിന്റെ പാരമ്പര്യമാണ് യോ​ഗയെന്നും പ്രധാനമന്ത്രി പറഞ്ഞു. ലോകം മുഴുവൻ യോഗയ്‌ക്കായി ഒത്തുചേരുന്നത് അത്ഭുതകരമാണെന്നും അദ്ദേഹം കൂട്ടിച്ചേർത്തു. 180-ലധികം രാജ്യങ്ങളിൽ നിന്നുള്ള പ്രതിനിധികളാണ് യുഎൻ ആസ്ഥാനത്ത് നടന്ന ആഘോഷങ്ങളിൽ പങ്കെടുത്തത്.

‘മുഴുവൻ മനുഷ്യരാശിയുടെയും സംഗമസ്ഥാനത്താണ് നമ്മൾ ഒത്തുകൂടിയത്. നിങ്ങളെ എല്ലാവരെയും കണ്ടതിൽ സന്തോഷമുണ്ട്. യോ​ഗ സെഷനിൽ പങ്കെടുക്കാൻ വന്ന എല്ലാവർക്കും നന്ദി അറിയിക്കുന്നു. യോ​ഗയുടെ ഉത്ഭവം ഭാരത്തിലാണ്. ഭാരതത്തിന്റെ പാരമ്പര്യമാണ് യോ​ഗ. പകർപ്പവകാശം, പേറ്റന്റുകൾ എന്നിവയിൽ നിന്നെല്ലാം മുക്തമാണ് യോ​ഗ’.

‘പ്രായം, ലിംഗഭേദം, ഫിറ്റ്നസ് നില എന്നിവയൊന്നും യോ​ഗയ്‌ക്ക് ബാധകമല്ല. യോ​ഗ സാർവത്രികമാണ്. യോഗ എന്നാൽ ഒന്നിക്കുക എന്നാണ്. എല്ലാ രാജ്യത്ത് നിന്നുള്ളവരും ഇന്നിവിടെ എത്തിയിട്ടുണ്ട്. ആരോഗ്യമുള്ളവരായിരിക്കാൻ മാത്രമല്ല, മറ്റുള്ളവരോട് ദയാപൂർവം പെരുമാറാനും യോ​ഗ നമ്മളെ പ്രാപ്തമാക്കുന്നു’ എന്നും നരേന്ദ്രമോദി പറഞ്ഞു.