ലോകമെമ്പാടും കെജിഎഫ് ചർച്ചയായതോടെ യാഷ് എന്ന താരത്തിന്റെ മാർക്കറ്റും ഉയർന്നിരുന്നു. പ്രമുഖ സംവിധായകരടക്കം ഡേറ്റിന് വേണ്ടി താരത്തിന്റെ പിന്നാലെയാണ്. അടുത്തിടെ, നിതേഷ് തിവാരിയുടെ വരാനിരിക്കുന്ന ചിത്രമായ രാമായണത്തിൽ രാവണനായി അഭിനയിക്കാൻ അണിയറ പ്രവർത്തകർ യാഷിനെ സമീപിച്ചിരുന്നെന്നും എന്നാൽ, ആ റോൾ താരം നിരസിച്ചെന്നും വാർത്തകൾ പ്രചരിച്ചിരുന്നു. ഇപ്പോഴിതാ, വാർത്തകളിൽ പ്രതികരിച്ചിരിക്കുകയാണ് യാഷ്.
നഞ്ചൻഗുഡിലെ ശ്രീകണ്ഠേശ്വര ക്ഷേത്രം സന്ദർശിച്ചക്കവെയാണ് യാഷിന്റെ പ്രതികരണം. നിതേഷ് തിവാരിയുടെ രാമായണത്തിൽ അഭിനയിക്കും എന്ന വാർത്ത ശരിയാണോ?, ബോളിവുഡിൽ അരങ്ങേറ്റം കുറിക്കുമോ? എന്ന ചോദ്യത്തിന് ‘ഞാൻ എവിടേക്കും പോകുന്നില്ല’ എന്നാണ് യാഷ് നൽകിയ മറുപടി. യഷിനൊപ്പം ഭാര്യ രാധിക പണ്ഡിറ്റും കുട്ടികളും ക്ഷേത്ര ദർശനത്തിനെത്തിയിരുന്നു. യാഷ് 19 എന്തുകൊണ്ട് വൈകുന്നു എന്നതിനെപ്പറ്റിയും താരം മാദ്ധ്യമങ്ങളോട് പ്രതികരിച്ചു.
‘ഒരു സിനിമ കാണാൻ ആളുകൾ കഠിനാധ്വാനം ചെയ്യുന്ന പണമാണ് നൽകുന്നത്. ആ പണത്തെ ഞാൻ വിലമതിക്കുന്നു. ഞങ്ങൾ ആത്മാർത്ഥതയോടെയും അർപ്പണബോധത്തോടെയുമാണ് പ്രവർത്തിക്കുന്നത്. രാജ്യം മുഴുവൻ, ലോകം മുഴുവൻ അടുത്ത ചിത്രത്തെപ്പറ്റി ഉറ്റുനോക്കുന്നുണ്ട്. എനിക്ക് ആ ഉത്തരവാദിത്തത്തെപ്പറ്റി നന്നായി അറിയാം. ഞങ്ങൾ വളരെക്കാലമായി കഠിനാധ്വാനം ചെയ്യുന്നു. സിനിമ വേഗം സംഭവിക്കും. പ്രേക്ഷകരെ സന്തോഷിപ്പിക്കേണ്ടത് എന്റെ ഉത്തരവാദിത്തമാണ്, ഞാൻ അത് നിറവേറ്റാൻ ശ്രമിക്കും. ഒരു ദിവസം മുഴുവൻ പാഴായിപ്പോകാൻ ഒരു സെക്കന്റ് പോലും ഞാൻ അനുവദിക്കില്ല’ എന്ന് യാഷ് പറഞ്ഞു.
Comments