ലോകമെമ്പാടുമുള്ള മലയാളികളുടെ പ്രിയപ്പെട്ട നടനും താരജാഡകളില്ലാത്ത മനുഷ്യ സ്നേഹിയും മുൻ എം.പിയുമായ സുരേഷ് ഗോപിയ്ക്ക് ഇന്ന് 65-ാം ജന്മദിനം. സിനിമയിലും ജീവിതത്തിലും ആക്ഷൻ മാസ് ഡയലോഗുകളിലൂടെ ജനങ്ങളുടെ മനം കവർന്ന ഒരേയൊരു താരമാണ് അദ്ദേഹം. മമ്മൂട്ടി, മോഹൻലാൽ എന്നിവർക്ക് ശേഷം മൂന്നാമനായി വന്ന സൂപ്പർ താരമാണ് സുരേഷ് ഗോപി. മാസ്സ് റോളുകൾക്ക് ബിഗ് ‘എം’ സിന് ഒപ്പമൊ അവരെക്കാൾ മുകളിലോ സ്‌കോർ ചെയ്യാൻ കഴിയുന്ന നടൻ. ‘മലയാളത്തിന്റെ മഹാനടൻമാരായാണ് മൂവരെയും കാണുന്നത്.
ഇപ്പോഴിതാ മലയാളത്തിന്റെ താരരാജാക്കൻമാരായ മമ്മൂട്ടിയും, മോഹൻലാലും താരത്തിന് ആശംസകൾ അറിയിച്ച് രംഗത്തുവന്നിരിക്കുകയാണ്. ജന്മദിനാശംസകൾ എന്ന കുറിപ്പിനൊപ്പം സുരേഷ് ഗോപിയ്ക്ക് ഒപ്പമുള്ള ചിത്രവും പങ്കുവെച്ചാണ് മമ്മൂട്ടി ആശംസ അറിയിച്ചിരിക്കുന്നത്. ജന്മദിനാശംസകൾ എന്ന കുറിപ്പിനൊപ്പം സുരേഷ് ഗോപിയുടെ ചിത്രം വെച്ചാണ് ലാലേട്ടൻ ആശംസ അറിയിച്ചിരിക്കുന്നത്.
മലയാള സിനിമാലോകത്തുള്ള മറ്റുപ്രമുഖരും താരത്തിന് ആശംസകൾ അറിയിച്ച് രംഗത്തുവന്നിട്ടുണ്ട്. ജനപ്രിയനായകൻ ദിലീപ്, ബിജു മേനോൻ, നിവീൻ പോളി, ടൊവിനോ തോമസ്‌, സംവിധായകരായ ജയരാജ്, വിഷ്ണു മോഹൻ എന്നിവരുൾപ്പടെ ജന്മദിനത്തിൽ അദ്ദേഹത്തിന് നിരവധിപ്പേരാണ് ജന്മദിനാശംസകൾ അറിയിച്ചിരിക്കുന്നത്.
ചലച്ചിത്ര വിതരണക്കാരനായിരുന്ന പരേതനായ ഗോപിനാഥൻ പിള്ളയുടെയും പരേതയായ ജ്ഞാനലക്ഷ്മി അമ്മയുടെയും മൂത്ത മകനായാണ് സുരേഷ് ഗോപി ജനിച്ചത്. ആദ്യകാല അഭിനേത്രി പരേതയായ ആറന്മുള പൊന്നമ്മയുടെ പേരമകളും ഗായികയുമായ രാധികയാണ് സുരേഷ് ഗോപിയുടെ പത്‌നി. 1990 മുതൽ 2000 വരെയുള്ള 10 വർഷം സുരേഷ് ഗോപിയുടെ സുവർണ കാലമായിരുന്നു. തലസ്ഥാനം, ഏകലവ്യൻ, മാഫിയ, കമ്മീഷണർ, നരിമാൻ, ലേലം, വാഴുന്നോർ, പത്രം തുടങ്ങിയ ചിത്രങ്ങൾ ഹിറ്റായതോടെയാണ് സുരേഷ് ഗോപി സൂപ്പർ സ്റ്റാർ പദവി കയ്യടക്കിയത്.
അതേസമയം ഒരു പെരുങ്കളിയാട്ടം, ഗരുഡൻ, ജെഎസ്‌കെ എന്നിങ്ങനെ നിരവധി ചിത്രങ്ങളാണ് സുരേഷ് ഗോപിയുടേതായി പുറത്തിറങ്ങാൻ അണിയറയിൽ ഒരുങ്ങിക്കൊണ്ടിരിക്കുന്നത്. സുരേഷ് ഗോപിയും ബിജുമേനോനും ഒന്നിച്ചെത്തുന്ന സിനിമയാണ് ഗരുഡൻ. താരത്തിന്റെ 65-ാം ദിനത്തോട് അനുബന്ധിച്ച് ചിത്രത്തിന്റെ ടീസർ പുറത്തുവിട്ടിരുന്നു. ക്രൈം ത്രില്ലർ മോഡലിലാണ് ചിത്രം ഒരുങ്ങുന്നത്. നവാഗതനായ അരുൺ വർമ്മയാണ് ചിത്രത്തിന്റെ സംവിധാനം നിർവഹിക്കുന്നത്.
Comments