ഈ കഴിഞ്ഞ ജൂൺ 30-ന് ദക്ഷിണ കൊറിയ സാക്ഷ്യം വഹിച്ചത് ചരിത്ര നിമിഷത്തിന്. രാജ്യത്തെ ദേശീയ ഓർക്കസ്ട്രയുടെ മിന്നും പ്രകടനത്തിനായി മുന്നിൽ നിന്ന് ചരടുവലിച്ചത് റോബോട്ട് ആയിരുന്നു. കൊറിയ ഇൻസ്റ്റിറ്റ്യൂട്ട് ഓഫ് ഇൻഡസ്ട്രിയൽ ടെക്നോളജി വികസിപ്പിച്ചെടുത്ത EveR 6 എന്ന റോബോട്ട് ആണ് ചടങ്ങിന് നേതൃത്വം വഹിച്ചത്. ഇൻസ്റ്റിറ്റ്യൂട്ട് വികസിപ്പിച്ചെടുത്ത ഈ റോബോട്ടിന് രണ്ട് കൈകളാണുള്ളത്. കൊറിയയിലെ നാഷണൽ തിയേറ്ററിൽ ആണ് ഇത് ആദ്യമായി അരങ്ങേറ്റം കുറിച്ചത്. ഓർക്കസ്ട്ര പരിപാടി ആരംഭിച്ചത് മുതൽ മനുഷ്യ സംഗീതജ്ഞൻ കാണിയ്ക്കുന്ന ചലനങ്ങളൊക്കെയും കൈകൾകൊണ്ട് റോബോട്ടും കാണിച്ചു.
തത്സമയ പരിപാടി ആയിരുന്നതിനാൽ തന്നെ റോബോട്ട് പ്രേക്ഷകരെ വണങ്ങിയും കൈകൾ വീശിയും പരിപാടി ആരംഭിയ്ക്കുകയായിരുന്നു. വളരെ മനോഹരമായി വേദിയെ കൈകാര്യം ചെയ്ത റോബോട്ടിന്റെ ബലഹീനതയെയും വേദി പങ്കിട്ടയാൾ ചൂണ്ടിക്കാട്ടി. റോബോട്ടിന് ഇതൊന്നും തന്നെ കേൾക്കാൻ സാധിക്കില്ല. കൊറിയയിലെ നാഷണൽ തീയേറ്റർ ഔദ്യോഗികമായി യൂട്യൂബ് ചാനലിലൂടെയാണ് വീഡിയോ പങ്കുവെച്ചത്.
മനുഷ്യ മുഖത്തിനോട് സാദൃശ്യമുള്ള റോബോട്ട് ആദ്യം പ്രേക്ഷകരെ വണങ്ങി. ഇതിന് ശേഷം ലൈവ് ഷോയുടെ ടെമ്പോ നിയന്ത്രിക്കുന്നതിനായി കൈകൾ വീശുവാൻ ആരംഭിച്ചു. ഒരു കണ്ടക്ടറുടെ ചലനം വളരെ പ്രാധാന്യം അർഹിക്കുന്നതാണെന്നും താൻ സങ്കൽപ്പിച്ചതിലും മനോഹരമായാണ് അവതരിപ്പിച്ചതെന്നും റോബോട്ടിനൊപ്പം പ്രകടനത്തിന് നേതൃത്വം നൽകിയ ചോയ് സൂ-യൂൽ പറഞ്ഞു. 1.8 മീറ്ററാണ് റോബോട്ടിന്റെ നീളം. പരമ്പരാഗത കൊറിയൻ വാദ്യോപകരണങ്ങൾ വായിക്കുന്ന 60-ൽ അധികം സംഗീതജ്ഞരെയാണ് റോബോട്ട് നയിച്ചത്. അരമണിക്കൂറിൽ അധികം നീണ്ടു നിന്ന പ്രകടനത്തിൽ ഗംഭീര പ്രകടനമായിരുന്നു കാഴ്ചവെച്ചത്.
