കടം വാങ്ങിയ പണം തിരികെ ചോദിച്ചു, അമ്മാവനെ കൊന്ന് കഷ്ണങ്ങളാക്കി കുഴിച്ചിട്ട് അനന്തരവൻ

കടംവങ്ങിയ 90,000 രൂപ തിരികെ ചോദിച്ച അമ്മാവനെ കൊലപ്പെടുത്തി അനന്തരവന്‍. മദ്ധ്യപ്രദേശ് ഗുണ ജില്ലയിലെ ബിസിനസുകാരനായ വിവേക് ശർമയാണ് ദാരുണമായി കൊല്ലപ്പെട്ടത്. വ്യാപാരിയെ കൊലപ്പെടുത്തി ആറു കഷ്ണങ്ങളാക്കി പ്ലാസ്റ്റിക് ബാഗിൽ കുഴിച്ചിടുകയായിരുന്നു. ഗോപാൽ കൃഷ്ണ സാഗർ അണക്കെട്ടിന് സമീപം കുഴിച്ചിട്ട മൃതേഹം പോലീസ് പിന്നീട് കണ്ടെത്തി.ഉപേക്ഷിക്കപ്പെട്ട നിലയിൽ മോട്ടോർ സൈക്കിളും കണ്ടെത്തിയിരുന്നു.

കടം വാങ്ങിയ പണം തിരികെ വാങ്ങാൻ ജൂലൈ 12നാണ് അനന്തരവനായ മോഹിതിനെ കാണാനായി വിവേക് ശർമ പോയത്. ചോദിച്ച സമയത്ത് പണം കൊടുക്കാനാവാതെ വന്നതോടെ ഇരുവരും തമ്മിൽ തർക്കമുണ്ടായി. പിന്നാലെ മെഡിക്കൽ റെപ്രസെന്റേറ്റീവായ മോഹിത് വിവേകിന്റെ ചായയിൽ ഉറക്കുഗുളിക കലർത്തി. അബോധാവസ്ഥയിലായ വിവേകിനെകൊലപ്പെടുത്തിയ ശേഷം ആറ് കഷ്ണങ്ങളാക്കി മുറിച്ച് ഉപേക്ഷിക്കുകയായിരുന്നു.ഇരുവരും തമ്മിൽ സാമ്പത്തിക ഇടപാടുകൾ നടക്കുന്നത് സാധാരണമായിരുന്നുവെന്നാണ് പോലീസ് വിശദമാക്കുന്നത്. എന്നാൽ .

അണക്കെട്ടിന് സമീപത്തായി മൂന്ന് കുഴികൾ എടുത്ത ശേഷം പ്ലാസ്റ്റിക് ബാഗുകളിൽ സൂക്ഷിച്ച മൃതദേഹം കുഴികളിലിട്ട് മൂടുകയായിരുന്നു. വിവേക് വീട്ടിലേക്ക് മടങ്ങി വരാതായതോടെ ഫോണിൽ ബന്ധപ്പെടുവാൻ കുടുംബം നിരവധി തവണ ശ്രമിച്ചിരുന്നു. സാദ്ധ്യമാകാതിരുന്നതോടെ കുടുംബം പോലീസിൽ പരാതിപ്പെടുകയായിരുന്നു. ചോദ്യം ചെയ്യലിൽ ആദ്യം പിടിച്ച് നിന്ന മോഹിത് പോലീസിനെ വഴിതെറ്റിക്കാനും ശ്രമിച്ചു. പിന്നീട് മോഹിതിന് കുറ്റം സമ്മതിക്കേണ്ടിവന്നു. ഇതിന് പിന്നാലെ മൃതദേഹം മറവ് ചെയ്ത സ്ഥലം ഇയാൾ പോലീസിന് കാണിച്ചുകൊടുക്കുകയായിരുന്നു.