ആദായ നികുതി റിട്ടേൺ സമർപ്പിക്കാൻ ഇനി ദിവസങ്ങൾ മാത്രമാണ് ബാക്കിയുള്ളത്. വ്യക്തിഗത നികുതിദായകർക്ക് ആദായ നികുതി സമർപ്പിക്കാനുള്ള തീയതി അടുക്കുന്തോറും ആശങ്കകളും വർദ്ധിക്കുകയാണ്. 2023-24 വര്‍ഷത്തിലെ ആദായ നികുതി റിട്ടേണ്‍ സമയപരിധി ജൂലൈ 31 ആണ്.
പലർക്കും ഇതിന്റെ പിന്നാലെ പോകാൻ മടിയുള്ളവരായിരിക്കും. മറ്റ് ചിലരാകട്ടെ അടയ്‌ക്കാൻ വിട്ടുപോകുന്നവരുമാണ്. പിന്നീട് സമയപരിധി അവസാനിച്ച് കഴിയുമ്പോഴായിരിക്കും പലപ്പോഴും ആദായ നികുതി റിട്ടേൺ സംബന്ധിച്ച കാര്യമോർക്കുക. എന്നാൽ ഈ മറവിയ്‌ക്കും മടിയ്‌ക്കും പരിഹാരവുമായെത്തിയിരിക്കുകയാണ് ഡിജിറ്റൽ പേയ്‌മെന്റ് പ്ലാറ്റ്‌ഫോമായ ഫോൺ പേ. ‘ഇൻകം ടാക്‌സ് പേയ്‌മെന്റ്’ എന്ന പേരിലാണ് ഫോൺപേ ഈ സൗകര്യമേർപ്പെടുത്തിയിരിക്കുന്നത്. സെൽഫ് അസസ്‌മെന്റും മുൻകൂർ ടാക്‌സും അടയ്‌ക്കാൻ ഇനി ഫോൺ പേയിലൂടെ കഴിയും. വ്യക്തികൾക്കും ബിസിനസുകാർക്കും ഇൻകം ടാക്‌സ് പോർട്ടലിൽ ലോഗ് ഇൻ ചെയ്യാതെ തന്നെ യുപിഐ അല്ലെങ്കിൽ ക്രെഡിറ്റ് കാർഡ് വഴി സെൽഫ് അസസ്‌മെന്റും മുൻകൂർ നികുതിയും അടയ്‌ക്കാവുന്നതാണ്. രണ്ട് പ്രവൃത്തി ദിവസത്തിനകം തുക ആദായനികുതി പോർട്ടലിൽ ക്രെഡിറ്റ് ആകും.
ഫോൺ പേ വഴി ആദായ നികുതി അടയ്‌ക്കേണ്ടത് ഇങ്ങനെ:
* പ്ലേ സ്റ്റോറിൽ നിന്ന് ഫോൺ പേ ആപ്പ് ഇൻസ്റ്റാൾ ചെയ്യുക. നേരത്തെ ഫോൺ പേ ഉപയോഗിക്കുന്നവർ അപ്‌ഡേറ്റ് ചെയ്യുക. പുതിയ ഫീച്ചർ പ്രകാരം ആദായ നികുതി ഐക്കൺ ആപ്പിൽ വന്നിട്ടുണ്ടാകും.
* ഇൻകം ടാക്‌സ് പേയ്‌മെന്റ് എന്ന ഐക്കണിൽ ക്ലിക്ക് ചെയ്ത് ആദായ നികുതി അടയ്‌ക്കേണ്ട പേജിലേക്ക് കടക്കാം
* തുടർന്ന് വരുന്ന ടാബിൽ അടയ്‌ക്കേണ്ട തരം, മൂല്യനിർണയ വർഷം, പാൻ കാർഡ് വിശദാംശങ്ങൾ എന്നിവ തിരഞ്ഞെടുക്കുക
ആകെ നികുതി തുക നൽകിയ ശേഷം ഉപയോക്താക്കൾക്ക് പേയ്‌മെന്റ് മോഡ് തിരഞ്ഞെടുത്ത് പണമടയ്‌ക്കാം. നികുതി അടച്ച് ഒരു പ്രവൃത്തി ദിവസത്തിനുള്ളിൽ തന്നെ നികുതിദായകർക്ക് അക്‌നോളജ്‌മെന്റായി ഒരു യുണീക്ക് ട്രാൻസാക്ഷൻ റഫറൻസ് നമ്പർ ലഭിക്കുന്നതാണ്. നികുതി അടച്ചതിന്റെ ചലാൻ രണ്ട് പ്രവൃത്തി ദിവസങ്ങൾക്കുള്ളിലും ലഭ്യമാകും. ക്രെഡിറ്റ് കാർഡ് പേയ്മെന്റുകൾക്കൊപ്പം ഉപയോക്താക്കൾക്ക് 45 ദിവസത്തെ പലിശ രഹിത കാലയളവും അവരുടെ ബാങ്കിനെ ആശ്രയിച്ച് നികുതി പേയ്മെന്റുകളിൽ റിവാർഡ് പോയിന്റുകൾ ലഭിക്കും.
Comments