മലയാളി യുവതി ഷാർജയിൽ തൂങ്ങിമരിച്ചു

കൊല്ലം: കല്ലുവാതുക്കൽ സ്വദേശി ഷാർജയിൽ ആത്മഹത്യ ചെയ്തു. കല്ലുവാതുക്കൽ മേവനകോണം സ്വദേശിനി റാണി ഗൗരി (29)നെയാണ് മരിച്ച നിലയിൽ കണ്ടെത്തിയത്. യുവതി ചാർട്ടേഡ് അക്കൗണ്ടന്റായിരുന്നു. സംഭവത്തിൽ ഭർത്താവിനും കുടുംബത്തിനുമെതിരെ പരാതിയുമായി യുവതിയുടെ കുടുംബം രംഗത്തെത്തിയിരിക്കുകയാണ്. യുവതിയ്‌ക്ക് നേരെ സ്ത്രീധന പീഡനവും മാനസിക പീഡനവും ഉണ്ടായിട്ടുണ്ടെന്ന് കുടുംബം ആരോപിക്കുന്നു. ആറ്റിങ്ങൽ അവനവഞ്ചേരി സ്വദേശി വൈശാഖാണ് റാണിയുടെ ഭർത്താവ്.

കഴിഞ്ഞ ദിവസമായിരുന്നു യുവതിയെ ഫ്‌ളാറ്റിൽ തൂങ്ങി മരിച്ച നിലയിൽ കണ്ടെത്തിയത്. ഷാർജയിൽ ഭർത്താവിനും നാല് വയസ്സുള്ള മൾക്കും ഒപ്പമായിരുന്നു റാണി ജീവിച്ചിരുന്നു. ഭർത്താവിൽ നിന്ന് യുവതിയ്‌ക്ക് മാനസിക പീഡനം ഏറ്റിരുന്നതായി കുടുംബം പറഞ്ഞു. വിവാഹത്തിന് മുൻപുള്ള റാണിയുടെ ബന്ധത്തെ ചൊല്ലിയും പ്രശ്‌നങ്ങൾ ഉണ്ടാക്കിയിരുന്നതായി കുടുംബം പറയുന്നു.

2018 ഫെബ്രുവരിയിലായിരുന്നു ഇരുവരുടേയും വിവാഹം.  130 പവൻ സ്വർണം സ്ത്രീധനമായി വാങ്ങിയായിരുന്നു വിവാഹം. ഷാർജയിലെ ഒരു സ്വകാര്യ കമ്പനിയിലെ എഞ്ചിനിയറാണ് വൈശാഖ്. ആറ് മാസം മുൻപാണ് റാണിയ്‌ക്ക് ജോലികിട്ടി ഷാർജയിലേയ്‌ക്ക് പോയത്.  ഷാർജയിൽ ഇരുവർക്കുമൊപ്പമുണ്ടായിരുന്ന വൈശാഖിന്റെ അമ്മ മിനി വിജയൻ ഒരാഴ്ച മുമ്പാണ് പേരക്കുട്ടി ദേവ്‌നയുമായി നാട്ടിലെത്തിയത്.  പ്രവാസി സംഘടനകളുടെ സഹായത്തോടെ ഭൗതികദേഹം നാട്ടിലെത്തിക്കാനാണ് തീരുമാനം.