പ്രധാനമന്ത്രിയുടെ സ്വപ്‌ന പദ്ധതി ‘ഓഖ-ബെയ്ത് ദ്വാരക സിഗ്നേച്ചർ പാലം’; ഒക്ടോബറോടെ ഉദ്ഘാടനം; വിനോദസഞ്ചാരികൾക്കായി ഒരുക്കുന്നത് കാഴ്ചയുടെ വിസ്മയം; സവിശേഷതകൾ അറിയാം

പ്രധാനമന്ത്രി നരേന്ദ്രമോദിയുടെ ഗുജറാത്തിലെ സ്വപ്ന പദ്ധതിയായ ‘ഓഖ-ബെയ്ത് ദ്വാരക സിഗ്‌നേച്ചർ പാലത്തിന്റെ’ നിർമ്മാണം അവസാന ഘട്ടത്തിൽ. മുഖ്യമന്ത്രി ഭൂപേന്ദ്ര പട്ടേലിന്റെ നേതൃത്വത്തിൽ ഗുജറാത്ത് സർക്കാർ സംസ്ഥാനത്തെ ചരിത്ര-വിനോദ സഞ്ചാര കേന്ദ്രങ്ങളിൽ വിവിധ വികസന പദ്ധതികളാണ് നടപ്പിലാക്കുന്നത്. ഇവയിൽ ഓഖയെയും ബെയ്റ്റ് ദ്വാരകയെയും ബന്ധിപ്പിക്കുന്ന സിഗ്‌നേച്ചർ പാലത്തിന്റെ നിർമ്മാണവും ഉൾപ്പെടുന്നു. പ്രധാനമന്ത്രിയുടെ സ്വപ്ന പദ്ധതികളിൽ ഒന്നായതിനാൽ തന്നെ ഇവയ്‌ക്കുള്ള പ്രാധാന്യവും വളരെ വലുതാണ്.

മുമ്പ് ഇതുവഴി സഞ്ചരിക്കുന്നതിനായി ഇവിടുത്തുകാർ ഫെറി ബോട്ടുകളെയാണ് ആശ്രയിച്ചിരുന്നത്. സിഗ്നേച്ചർ പാലം നിലവിൽ വരുന്നതോടെ ഇതിന് വലിയ ആശ്വാസമാകും എന്നാണ് പ്രതീക്ഷ.978 കോടി രൂപ ചെലവിലാണ് പാലത്തിന്റെ നിർമ്മാണം. 2320 മീറ്ററോളം നീളമുള്ള പാലത്തെ താങ്ങി നിർത്തുന്നത് ആധുനിക ഹോക്ക് ക്രെയിനുകൾ ഉപയോഗിച്ച് കടലിൽ നിന്നും നിർമ്മിച്ചിരിക്കുന്ന 38 തൂണുകളാണ്. 2018 മാർച്ചിലാണ് പദ്ധതി ആരംഭിക്കുന്നത്. ഏകദേശം 92 ശതമാനത്തോളം നിർമ്മാണ പ്രവർത്തനങ്ങളും പൂർത്തിയായതായി ഔദ്യോഗിക വൃത്തങ്ങൾ സൂചിപ്പിക്കുന്നു.

2023 ഒക്ടോബറോട് കൂടി പാലം ഉപയോഗ സജ്ജമാകും എന്നാണ് വിലയിരുത്തൽ. കൂടാതെ സിഗ്നേച്ചർ ബ്രിഡ്ജ് ഗുജറാത്തിന്റെ വികസന പാതയിലെ തന്നെ നാഴികക്കല്ലായിരിക്കും എന്നുമാണ് വിലയിരുത്തൽ. ഇത് ഇരു പ്രദേശങ്ങളിലെയും ആളുകൾക്കും വിനോദ സഞ്ചാരികൾക്കും ഉപകാരപ്രദമായിരിക്കും എന്നാണ് പ്രതീക്ഷ.

ഓഖ-ബെയ്റ്റ് സിഗ്നേച്ചർ പാലത്തിന്റെ സവിശേഷതകൾ…

• 2320 മീറ്റർ നീളത്തിൽ 900 മീറ്റർ കേബിൾ സ്റ്റേഡ് വിഭാഗത്തിനായി സമർപ്പിച്ചിരിക്കുന്ന ഘടനയാണ് സിഗ്നേച്ചർ പാലത്തിനുള്ളത്.
• 2452 മീറ്ററിൽ ആസൂത്രണം ചെയ്ത ഓഖ-ബെയ്‌റിറ് ദ്വാരക റോഡ് ഇരു പ്രദേശത്തിനും ഗുണകരമായിരിക്കും
• പാലത്തിന്റെ പ്രധാന ഇടയകലം 500 മീറ്ററാണ്. ഇത് രാജ്യത്തെ തന്നെ ഏറ്റവും ദൈർഘ്യമേറിയ സ്പാൻ എന്ന റെക്കോർഡ് സ്വന്തമാക്കി.
• സന്ദർശകരെ ഉൾക്കൊള്ളുന്നതിനായി ഓഖയിൽ പ്രത്യേക പാർക്കിംഗ് ഏരിയ സംവിധാനം നിർമ്മിക്കും
• 130 മീറ്റർ ഉയരത്തിലുള്ള രണ്ട് സ്‌ട്രൈക്കിംഗ് പൈലോണുകളാണ് പാലത്തിന്റെ പ്രധാന സ്പാനിൽ ഉള്ളത്.
• 27.20 മീറ്റർ വീതിയിലുള്ള നാല് വരിപ്പാതയിൽ ഇരുവശത്തുമായി 2.50 മീറ്റർ ഇടത്ത് അടിപ്പാതകൾ ഉണ്ടാകും
• നടപ്പാതയിൽ സോളാർ പാനലുകൾ സ്ഥാപിക്കും, ബ്രിഡ്ജ് ലൈറ്റിംഗിന് വേണ്ടി ഇതിലൂടെ 1 മെഗാവാട്ട് വൈദ്യുതി ഉൽപ്പാദിപ്പിക്കും. ഇതിന് പുറമേ ഓഖയുടെ വൈദ്യുതി ആവശ്യകതകളും നിറവേറ്റും. പരിസ്ഥിതി സൗഹൃദ സംരംഭങ്ങളും ഇവയിൽ ഉൾപ്പെടുന്നു.
• വിനോദസഞ്ചാരികൾക്ക് ഉപകാരപ്രദമാകും വിധം പാലത്തിന്റെ 12 ഇടങ്ങളിലായി വ്യൂ ഗാലറികൾ സ്ഥാപിക്കും.
• വൈകുന്നേരങ്ങളിൽ കൂടുതൽ മനോഹരമാക്കുന്നതിനായി അലങ്കാര ലൈറ്റുകൾ ഉൾപ്പെടെ സ്ഥാപിക്കും