തമിഴകത്തെ സൂപ്പർ സ്റ്റാർ ആരെന്ന ചോദ്യത്തിന് ഒരു ഉത്തരമേ ഉണ്ടാവുകയുള്ളൂ, സ്റ്റൈൽ മന്നൻ രജനീകാന്ത്. വർഷങ്ങളായി ആ പേര് തമിഴകത്തും പുറത്തും നിറഞ്ഞു നിൽക്കുന്നു. 1978-ലാണ് അദ്ദേഹത്തിന് സൂപ്പർ സ്റ്റാർ പദവി ലഭിക്കുന്നത്. ഭൈരവി എന്ന ചിത്രത്തിലാണ് സൂപ്പർസ്റ്റാർ എന്ന വിശേഷണം ആദ്യമായി പ്രത്യക്ഷപ്പെട്ടത്. അന്നുമുതൽ ഇന്ന് വരെ തമിഴ് സിനിമാ പ്രേമികൾക്ക് സൂപ്പർ സ്റ്റാർ എന്നാൽ രജനീകാന്ത് തന്നെ. രജനീകാന്തിന് ശേഷം ആരെന്ന ചോദ്യം കുറേ നാളുകളായി തമിഴ് സിനിമാ പ്രേമികൾക്കിടയിൽ ചർച്ചാ വിഷയമാണ്. നടൻ വിജയിയെ രജനിക്ക് മേൽ പ്രതിഷ്ഠിക്കാൻ വിജയ് ഫാൻസ് ശ്രമിക്കുന്നുമുണ്ട്. ഇപ്പോഴിതാ, വിഷയത്തിൽ തന്റെ അഭിപ്രായം പങ്കുവെച്ചിരിക്കുകയാണ് നടൻ പ്രഭു.
വാരിസ് ഓഡിയോ ലോഞ്ചിൽ നടന്ന ഒരു സംഭവത്തിന് ശേഷമാണ് ഒരു വിഭാഗം വിജയ് ആരാധകർ വിജയിയെ സൂപ്പർ സ്റ്റാർ എന്ന് വിശേഷിപ്പിക്കാൻ തുടങ്ങിയത്. ‘വിജയ് സൂപ്പർ സ്റ്റാറാകുമെന്ന് താൻ എപ്പോഴും കരുതിയിരുന്നു. ഇപ്പോൾ സൂപ്പർ സ്റ്റാറായി മാറി’ എന്ന ശരത് കുമാറിന്റെ വാക്കുകൾ ഉയർത്തിക്കാട്ടിയാണ് രജനിക്കുമേൽ വിജയിയെ പ്രതിഷ്ഠിക്കാൻ ആരാധകർ വെമ്പൽ കൊള്ളുന്നത്. എന്നാൽ, സൂപ്പർ സ്റ്റാർ എന്നാൽ അത് രജനീകാന്ത് തന്നെയാണെന്നാണ് പ്രഭുവിന്റെ പ്രതികരണം. ആ നിരയിലേയ്‌ക്ക് ഉയർന്ന് വരാൻ മറ്റുള്ള നടന്മാർ പരിശ്രമിക്കട്ടെ എന്നും താരം പറയുന്നു.
‘എന്റെ അണ്ണൻ രജനീകാന്ത് ആണ് സൂപ്പർ സ്റ്റാർ. ബാക്കിയുള്ളവർ സൂപ്പർ ആക്ടേഴ്സ് ആണ്. വിജയ് വളർന്നു വരട്ടെ. ”അതേ ഇടത്തിൽ തന്നെ നിൽക്കാൻ കഴിയില്ല, ആരെങ്കിലും വരണം” എന്ന് രജനീകാന്ത് സർ തന്നെ പറഞ്ഞിട്ടില്ലേ. അദ്ദേഹം വഴി ഒരുക്കി നൽകിയിട്ടുണ്ട്. എന്നാൽ സൂപ്പർസ്റ്റാർ എന്നാൽ രജനീകാന്ത് തന്നെയാണ്. കുട്ടികളെല്ലാം നല്ല നടന്മാരായി ഈ പദവിയിലോട്ട് എത്തട്ടെ. വന്നാൽ സന്തോഷം. വിജയ് മാത്രമല്ലല്ലോ, അജിത്തും ഇവിടെ ഉണ്ട്. അവരെല്ലാവരും വരട്ടെ. തങ്ങളുടെ പ്രിയപ്പെട്ട നടൻ സൂപ്പർ സ്റ്റാർ ആകാൻ അവരവരുടെ ആരാധകർ ആഗ്രഹിക്കുന്നതല്ലേ’- പ്രഭു പറഞ്ഞു.
Comments