ആയുധങ്ങളും പടയാളികളും അടങ്ങുന്ന ഒരു കുരുക്ഷേത്ര ഭൂമിയാണ് ഓരോ വീടുകളിലേയും അടുക്കളകൾ. എതിരാളികളെ വെട്ടിയരിയുന്ന രീതിയിലാവും അടുക്കള ഭരിക്കുന്നവരിൽ പലരും പച്ചക്കറി അരിയുക. ഇതിൽ ബലിയാടാവേണ്ടി വരുന്നതോ പാവം കട്ടിംഗ് ബോർഡുകളും. പല വീടുകളിലേയും കട്ടിംഗ് ബോർഡുകൾ ക്ഷതങ്ങൾ സംഭവിച്ച അവസ്ഥയിലുമായിരിക്കും. മരം കൊണ്ടുണ്ടാക്കിയ കട്ടിംഗ് ബോർട്ടുകളാണ് നിങ്ങൾ ഉപയോഗിക്കുന്നതെങ്കിൽ മറ്റ് ബോർഡുകളെ അപേക്ഷിച്ച് അവ വൃത്തിയായി സൂക്ഷിക്കേണ്ടത് അനിവാര്യമാണ്. ഇവയുടെ ഈട് കൂട്ടാനും എളുപ്പത്തിൽ വൃത്തിയാക്കാനുമുള്ള ചില പൊടികൈകൾ നോക്കാം..
ഉപ്പും നാരങ്ങയും ചേർത്ത് കഴുകാം..
മാംസങ്ങളും മറ്റും മുറിച്ചതിന് ശേഷം കട്ടിംഗ് ബോർഡുകളിൽ ചിലപ്പോൾ രൂക്ഷഗന്ധം അനുഭവപ്പെടാറുണ്ട്. ഇത് നീക്കം ചെയ്യാനായി കല്ലുപ്പും നാരങ്ങയും ചേർത്ത് കുറച്ച് നേരം ഉരച്ചതിന് ശേഷം കഴുകി കളയാവുന്നതാണ്.
വീര്യം കുറഞ്ഞ സോപ്പ് ഉപയോഗിക്കാം..
ഭക്ഷണം കഴിച്ചതിന് ശേഷം പാത്രങ്ങൾ കഴുകുന്നത് എത്രത്തോളം പ്രാധാന്യമുണ്ടോ അതുപോലെ തന്നെയാണ് കട്ടിംഗ് ബോർഡുകൾ കഴുകുന്നതും. വീര്യം കുറഞ്ഞ സോപ്പോ, ലിക്യുഡ് ഡിഷ്വാഷോ ഉപയോഗിച്ച് കട്ടിംഗ് ബോർഡ് കഴുകി വൃത്തിയാക്കാം.
എണ്ണ പുരട്ടുക
മരം കൊണ്ട് നിർമ്മിച്ച കട്ടിംഗ് ബോർഡാണ് നിരന്തരമായി നിങ്ങൾ ഉപയോഗിക്കുന്നതെങ്കിൽ അവ പെട്ടന്ന് പൊട്ടിപോകാനും വരണ്ടുണങ്ങാനും സാദ്ധ്യതയുണ്ട്. അതിനാൽ മിനറൽ ഓയിൽ പുരട്ടി ഒരു രാത്രി കട്ടിംഗ് ബോർഡ് എടുത്തുവെച്ചതിന് ശേഷം കഴുകി കളയാവുന്നതാണ്.
വിനാഗിരി
കട്ടിംഗ് ബോർഡ് വൃത്തിയായി സൂക്ഷിക്കാൻ മറ്റൊരു എളുപ്പ വഴിയാണ് വിനാഗിരി. ബോർഡിലെ രൂക്ഷഗന്ധം അകറ്റി അവ വൃത്തിയായി സൂക്ഷിക്കാൻ വിനാഗിരി സഹായിക്കുന്നു. ഇത് പുരട്ടിയ ശേഷം 4, 5 മിനിറ്റ് ഉരച്ചതിന് ശേഷം കഴുകി കളയാവുന്നതാണ്.
