ഓരോ വീട്ടുമുറ്റത്തും ദേശീയ പതാക ഉയർത്താനായി ആരംഭിച്ച ‘ഹർ ഘർ തിരംഗ’ ക്യാമ്പെയ്ൻ ഈ വർഷവും തുടരും. പൗരന്മാർക്ക് പോസ്റ്റ് ഓഫീസുകളിൽ നിന്ന് ദേശീയ പതാക വാങ്ങാവുന്നതാണ്. ഓൺലൈനായും ഈ സൗകര്യം ലഭ്യമാണ്. രാജ്യത്തെ 1.60 ലക്ഷം പോസ്റ്റ് ഓഫീസുകളിലാണ് ഹർ ഘർ തിരംഗയുടെ ഭാഗമായി ത്രിവർണ പാതകൾ ലഭ്യമാകുക. വകുപ്പിന്റെ ഇ-പോസ്റ്റ് ഓഫീസ് സൗകര്യം പ്രയോജനപ്പെടുത്തണമെന്നും തപാൽ വകുപ്പ് അറിയിച്ചിട്ടുണ്ട്. ഓഗസ്റ്റ് 13 മുതൽ 15 വരെയാണ് ക്യാമ്പെയ്ൻ.
വ്യക്തികൾ, സ്വകാര്യ സ്ഥാപനങ്ങൾ, വിദ്യാഭ്യാസ സ്ഥാപനങ്ങൾ എന്നിവർക്ക് ദേശീയ പതാക എല്ലാ ദിവസും ഉയർത്താം. ദേശീയ പതാകയുടെ അന്തസും ബഹുമാനവും നിലനിർത്തിയാകണം ഇത്. പൊതു ഇടങ്ങളിലും വ്യക്തികളുടെ വീടുകളിലും ദേശീയ പതാക പകലും രാത്രിയും പ്രദർശിപ്പിക്കാം.കോട്ടൺ, പോളിസ്റ്റർ, നൂൽ, സിൽക്ക്, ഖാദി എന്നിവ ഉപയോഗിച്ച് കൈകൊണ്ടുണ്ടാക്കിയതോ മെഷീൻ നിർമിതമോ ആയ ദേശീയ പതാകയാണ് ഉപയോഗിക്കേണ്ടത്. ദീർഘ ചതുരാകൃതിയിലാകണം ദേശീയ പതാക. നീളവും ഉയരവും 3:2 അനുപാതത്തിലായിരിക്കണം. ആദരവും ബഹുമതി ലഭിക്കത്തക്കവിധമാകണം പതാക സ്ഥാപിക്കേണ്ടത്. മുഷിഞ്ഞ പതാക ഉപയോഗിക്കരുതെന്നും നിർദ്ദേശത്തിൽ പറയുന്നു. കഴിഞ്ഞ വർഷം ഇത് സംബന്ധിച്ച് 2002-ലെ ഫ്ളാഗ് കോഡിൽ ഭേദഗതി വരുത്തിയിരുന്നു.
ഹർ ഘർ തിരംഗ 2.0; നിർദ്ദേശങ്ങൾ പുറപ്പെടുവിച്ച് കേന്ദ്രം
തപാൽ ഓഫീസിൽ നിന്ന് ത്രിവർണ്ണ പതാക വാങ്ങേണ്ടത് ഇങ്ങനെ:
* പോസ്റ്റ് ഓഫീസിന്റെ ഔദ്യോഗിക വെബ്സൈറ്റായ www.indiapost.gov.in തുറക്കുക
* ഹോം പേജിൽ, ‘ ‘Buy National Flag from your nearest post office or Buy it Online’ എന്ന ഓപ്ഷനിൽ ക്ലിക്ക് ചെയ്യുക.
* ‘ഹർ ഘർ തിരംഗ’ എന്ന തലക്കെട്ടിന് കീഴിലുള്ള ‘Buy’ എന്ന ഓപ്ഷനിൽ ക്ലിക്ക് ചെയ്യുക.
* തുടർന്ന് 25 രൂപ അടച്ച് ഓൺലൈനായി ദേശീയ പതാക ബുക്ക് ചെയ്യാവുന്നതാണ്.
* തുടർന്ന് തപാൽ വകുപ്പ് പതാക നിങ്ങളുടെ വീട്ടിലെത്തിക്കും. അധിക ഡെലിവറി നിരക്കുകളില്ലാതെ ഒരാൾക്ക് പരമാവധി അഞ്ച് പതാകകൾ ഓൺലൈനായി ഓർഡർ ചെയ്യാവുന്നതാണ് .
അടുത്തുള്ള പോസ്റ്റ് ഓഫീസ് സന്ദർശിച്ചും തിരംഗ വാങ്ങാവുന്നതാണ്.
