പ്രതിപക്ഷ സഖ്യത്തിന് ഒരു കാഴ്ചപ്പാട് ഇല്ല, ഒരു ലക്ഷ്യം ഇല്ല, ഒരു നേതാവ് പോലും ഇല്ല; ഇങ്ങനെയുള്ളവരെ കേരളവും ഇന്ത്യയും എന്തിന് തിരഞ്ഞെടുക്കണം: അനിൽ ആന്റണി

കോട്ടയം: പുതുപ്പള്ളിയിൽ നടക്കുന്നത് രാഷ്‌ട്രീയ തിരഞ്ഞെടുപ്പാണ് അവിടെ വ്യക്തി ബന്ധങ്ങൾക്ക് സ്ഥാനമില്ലെന്ന് ബിജെപി ദേശീയ സെക്രട്ടറി അനിൽ ആന്റണി. വ്യക്തിപരമായി ബന്ധമുള്ള ആളാണ് ചാണ്ടി ഉമ്മൻ. എന്നാൽ വ്യക്തിപരമായ തിരഞ്ഞെടുപ്പല്ല പുതുപ്പള്ളിയിൽ നടക്കുന്നത്. ആശയപരമായ, രാഷ്‌ട്രീയപരമായ തിരഞ്ഞെടുപ്പാണ് നടക്കുന്നത്. കേരളത്തിനെയും ഇന്ത്യയേയും മുന്നോട്ട് കൊണ്ടുപോകാൻ ഇന്ന് ഒരു രാഷ്‌ട്രീയ പാർട്ടിക്കേ സാധിക്കൂ, അത് ബിജെപിക്കാണ്. നരേന്ദ്രമോദി നയിക്കുന്ന ബിജെപിക്ക് മാത്രമാണ് അത് സാധ്യമാകുക.

സ്വന്തം ജനങ്ങളോട് പോലും കമ്യൂണിസ്റ്റ് പാർട്ടിയും കോൺഗ്രസും നീതി പുലർത്തുന്നില്ല. എന്തെല്ലാം കാര്യങ്ങൾ ജനങ്ങൾക്ക് വേണ്ടി ചെയ്യാൻ സാധിക്കും. കോൺഗ്രസും കമ്യൂണിസ്റ്റ് പാർട്ടിയും മറ്റ് 24 പാർട്ടിക്കാരും ഒന്നിക്കുന്ന ഐ.എൻ.ഡി.ഐ.എ എന്ന മുന്നണിക്ക് ഒരു നേതാവ് പോലും ഇല്ല. ആ പാർട്ടികൾ എല്ലാം ഒരുമിക്കുന്നത് ഒരേ ഒരു കാര്യത്തിന് വേണ്ടി മാത്രമാണ്, നരേന്ദ്രമോദിയെ താഴെയിറക്കുക. ഇന്ത്യയിലെ ഏറ്റവും ജനസമ്മതനായ നേതാവും ലോകത്തിലെ ഏറ്റവും ജനസമ്മതനായ പ്രധാനമന്ത്രിയും നരേന്ദ്രമോദിയാണ്.

പ്രതിപക്ഷ സഖ്യത്തിന് ഒരു കാഴ്ചപ്പാട് ഇല്ല, ഒരു ലക്ഷ്യവും ഇല്ല. എന്തിന്, ഒരു നേതാവ് പോലും അവർക്കില്ല. ഇങ്ങനെയുള്ളവർ ഒരുമിക്കുന്നത് ഇന്ത്യയ്‌ക്കും കേരളത്തിനും ഒരു ഓപ്ഷനേ അല്ല. പുതുപ്പള്ളി മണ്ഡലം ഒരു തുടക്കമാണ്. ഇത് വെറും ഒരു ഉപതിരഞ്ഞെടുപ്പ് മാത്രമല്ല, മാറ്റത്തിന് തുടക്കം കുറിക്കുന്ന തിരഞ്ഞെടുപ്പ് കൂടിയാണ്. 1984- ൽ ബിജെപിക്ക് രണ്ട് സീറ്റുകളെ ഉണ്ടായിരുന്നുള്ളൂ. എന്നാൽ, 13 വർഷം കൊണ്ട് അഖിലേന്ത്യ തലത്തിൽ ഈ പാർട്ടി സർക്കാരുണ്ടാക്കി. 20-25 വർഷം കൊണ്ട് ലോകത്തിലെ തന്നെ ഏറ്റവും വലിയ പാർട്ടിയായി ബിജെപി മാറി. ഇത് കേരളത്തിലും നടക്കും. കേരളത്തിലെ ഏറ്റവും വലിയ പാർട്ടിയായി ബിജെപി മാറും. ഇന്നല്ലെങ്കിൽ നാളെ കേരളം ബിജെപി ഭരിക്കും- അനിൽ ആന്റണി പറഞ്ഞു.