മുംബൈ: അയൽവാസിയുടെ വളർത്തുനായയ്ക്ക് നേരെ ആസിഡ് ആക്രമണം നടത്തിയ യുവതി അറസ്റ്റിൽ. മുംബൈയിലെ മാൽവാനി സ്വദേശിയായ ഷബിസ്ത സുഹൈൽ (35)ആണ് അറസ്റ്റിലായത്. യുവതി താമസിക്കുന്ന അതേ അപ്പാർട്ട്മെന്റിലുള്ള കുടുംബത്തിലെ നായയ്‌ക്ക് നേരെയാണ് യുവതി ആസിഡ് ഒഴിച്ചത്.
ഷബിസ്തയുടെ വളർത്തുപൂച്ചയുമായി അയൽവാസിയുടെ ബ്രൗണി എന്ന നായ കളിക്കുന്നതിൽ യുവതിയ്‌ക്ക് ഇഷ്ടക്കേട് ഉണ്ടായിരുന്നു. പലതവണ അയൽവാസിയോട് നായയെ കെട്ടിയിടാൻ പറഞ്ഞിരുന്നെങ്കിലും അവർ അത് മുഖവിലയ്‌ക്ക് എടുത്തിരുന്നില്ല. ഇതേ തുടർന്നുള്ള വൈരാഗ്യത്തിലാണ് റോഡരികിൽ കിടന്നുറങ്ങുകയായിരുന്ന നായയുടെ ശരീരത്തിലേക്ക് ഷബിസ്ത ആസിഡ് പ്രയോഗം നടത്തിയത്.
ആക്രമണത്തിൽ ഗുരുതരമായി പരിക്കേറ്റ നായയെ ചികിത്സയ്‌ക്കായി മൃഗാശുപത്രിയിൽ പ്രവേശിപ്പിച്ചു. യുവതി നായയുടെ ശരീരത്തിൽ ആസിഡ് ഒഴിക്കുന്നതിന്റെ സിസിടിവി ദൃശ്യങ്ങൾ പോലീസ് ശേഖരിച്ചിട്ടുണ്ട്. യുവതിയ്‌ക്കെതിരെ മൃഗങ്ങളോടുള്ള ക്രൂരതയ്‌ക്ക് പോലീസ് കേസെടുത്തിട്ടുണ്ട്.
Comments