ഒരാളുടെ ഭക്ഷണശീലങ്ങൾ മാനസികാരോഗ്യത്തെ ബാധിക്കുമെന്നാണ് പറയപ്പെടുന്നത്. മാനസികാരോഗ്യം വർദ്ധിപ്പിക്കാൻ പോഷകാഹാരം വഹിക്കുന്ന പങ്ക് വളരെ വലുതാണ്. ദിവസവും ഒരു പിടി നട്സ് കഴിച്ചാലുള്ള ആരോഗ്യഗുണങ്ങൾ ചെറുതൊന്നുമല്ല. കാരണം ധാരാളം പോഷകഗുണങ്ങൾ നട്സിൽ അടങ്ങിയിരിക്കുന്നു. രക്തത്തിലെ പഞ്ചസാരയുടെ അളവ് കൂടാതിരിക്കാൻ സഹായിക്കുന്ന ഒന്നാണ് നട്സ്. ബദാം, വാള്നട്സ്, കശുവണ്ടി, ഹേസല്നട്സ്, പിസ്ത, ബ്രസീല് നട്സ് ഏതുമാകട്ടെ ദിവസവും ഒരുപിടി നട്സ് കഴിക്കുന്നത് ആരോഗ്യം മെച്ചപ്പെടുത്തും. അണ്ടിപ്പരിപ്പ് കഴിക്കുന്നത് മാനസികാരോഗ്യ രോഗത്തിനുള്ള സാധ്യത കുറയ്ക്കുമെന്നാണ് കണ്ടെത്തൽ.
എല്ലാ ദിവസവും നട്സ് കഴിക്കുന്ന ആളുകൾക്ക് വിഷാദരോഗ സാധ്യത 17 ശതമാനം വരെ കുറയ്ക്കുമെന്നാണ് പഠനങ്ങൾ പറയുന്നത്. നട്സില് അടങ്ങിയിരിക്കുന്ന ഫൈറ്റോകെമിക്കലുകള്ക്ക് ആന്റി ഇന്ഫ്ളമേറ്ററി, ആന്റി ഓക്സിഡന്റ് ഗുണങ്ങളുണ്ടെന്നും ഇത് മാനസികാരോഗ്യം വര്ധിപ്പിക്കുമെന്നും കണ്ടെത്തി. കൂടാതെ ഇവയിലുള്ള അര്ജിനൈന്, ഗ്ലൂട്ടമൈന്, സെറൈന്, ട്രിപ്റ്റോഫാന് പോലുള്ള അമിനോ ആസിഡുകളും മാനസികാവസ്ഥ മെച്ചപ്പെടുത്തും.
നട്സ് കഴിക്കുന്ന വ്യക്തികൾക്ക് നല്ല ഉറക്കം ലഭിക്കും. വ്യായാമം, ശുചിത്വം എന്നിവ പോലെയുള്ള ആരോഗ്യത്തെ പ്രോത്സാപ്പിക്കുന്ന ശീലങ്ങളും ഇവരിൽ കണ്ടുവരുന്നു. ഇത് മാനസിക വൈകല്യങ്ങൾക്കുള്ള സാധ്യത കുറയ്ക്കുന്നതാണ്. നട്സില് വൈറ്റമിന് ഇ-യും ഒമേഗ-3 ഫാറ്റി ആസിഡുകളും അടങ്ങിയിരിക്കുന്നു. ഇവയും ശാരീരിക, മാനസിക ആരോഗ്യത്തിന് നല്ലതാണ്. മസ്തിഷ്ക പ്രവർത്തനത്തിനും, വിഷാദരോഗ സാധ്യത ലഘൂകരിക്കാനും ഇത് ഉപകരിക്കുമെന്ന് സ്പെയ്നിലെ ഹെല്ത്ത് ആന്ഡ് സോഷ്യല് റിസര്ച്ച് സെന്ററിലെ ഗവേഷകരുടെ പഠനത്തിൽ പറയുന്നു.
