മുംബൈ: വിന്ഡീസിനെതിരെയുള്ള പരമ്പര തോല്വിയും ഫോം ഔട്ടും ഇന്ത്യയുടെ ഭാവി ക്യാപ്റ്റനായി വാഴ്ത്തുന്ന ഹാര്ദിക്ക് പാണ്ഡ്യയ്ക്ക് തിരിച്ചടിയായേക്കും. താരത്തിന്റെ ഏകദിനത്തിലെ ഉപനായക സ്ഥാനം നഷ്ടമായേക്കുമെന്നാണ് വിവരം. ഏഷ്യാ കപ്പിലും ലോക കപ്പിലും രോഹിത് ശര്മ്മയ്ക്ക് സഹായിയായി പുതിയ വൈസ് ക്യാപ്റ്റന് എത്തിയേക്കുമെന്നാണ് സൂചന. നിലവില് അയര്ലന്ഡിനെതിരെ ഇന്ത്യയെ നയിക്കുന്ന ജസ്പ്രിത ബുമ്രയ്ക്ക് നറുക്ക് വീഴാന് സാദ്ധ്യതയുണ്ടെന്നാണ് ദേശീയ മാദ്ധ്യമങ്ങള് റിപ്പോര്ട്ട് ചെയ്യുന്നത്.
നിലവില് ടി20 ക്യാപ്റ്റനായ താരത്തിന്റെ ഈ സ്ഥാനത്തിനും ചലനമുണ്ടായേക്കും. ഐപിഎല്ലില് ഗുജറാത്ത് ടൈറ്റന്സിനെ ആദ്യ സീസണില് വിജയത്തിലേക്ക് നയിച്ചതോടെയാണ് ഹാര്ദിക്കിന്റെ ക്യാപ്റ്റന്സി സാധ്യതകള് ചര്ച്ച ചെയ്യപ്പെട്ടത്.ഈ വര്ഷം ന്യൂസിലന്ഡ്, ശ്രീലങ്ക, ഓസ്ട്രേലിയ, വെസ്റ്റ് ഇന്ഡീസ് എന്നിവര്ക്കെതിരായ ഏകദിന പരമ്പരില് ക്യാപ്റ്റന് രോഹിത് ശര്മയുടെ ഡെപ്യൂട്ടിയും ഹാര്ദിക്കായിരുന്നു.
‘വൈസ് ക്യാപ്റ്റന്സി കാര്യത്തില് രണ്ടാമതൊന്ന് ചിന്തിക്കേണ്ടിവരുമെന്നുള്ള കാര്യമുറപ്പാണ്. ഹാര്ദിക്കിന് ഒട്ടും എളുപ്പമാവില്ല കാര്യങ്ങള്. ഹാര്ദിക്കിന് മുമ്പ് ബുമ്ര ഇന്ത്യയുടെ ക്യാപ്റ്റനായിരുന്നുവെന്നുള്ള ഓര്മവേണം. സീനിയോരിറ്റി ബുമ്രയ്ക്ക് തന്നെയാണ്. 2022 ഇന്ത്യ ദക്ഷിണാഫ്രിക്കന് പര്യടനം നടത്തിയപ്പോള് വൈസ് ക്യാപ്റ്റനും ബുമ്രയായിരുന്നു. അതുകൊണ്ടുതന്നെ ഏഷ്യാ കപ്പിനും ലോകകപ്പിലും ബുമ്ര വൈസ് ക്യാപ്റ്റനാവുന്നത് തള്ളി കളയാനാവില്ല.” പി.ടി.ഐ വ്യക്തമാക്കി.
likely
