ഏഷ്യകപ്പിൽ ഇന്ത്യ ഇന്ന് തങ്ങളുടെ ചിരവൈരികളായ പാകിസ്താനെ നേരിടാനിരിക്കുകയാണ്. ഒപ്പം സോഷ്യൽ മീഡിയയിൽ വിരാട് കോഹ്ലിയെയും പാക് താരം ബാബർ അസമിനെയും താരതമ്യം ചെയ്തുളള ചർച്ചകൾ ചൂടുപിടിക്കുകയാണ്. എന്നാൽ സോഷ്യൽ മീഡിയയിലെ ആരാധകരുടെ ഏറ്റുമുട്ടലിനെകുറിച്ച് ബാബറിന്റെ മറുപടിയാണ് ഇപ്പോൾ വൈറൽ. വിരാട് കോഹ്ലി ഏറ്റവും മുതിർന്ന, ഞാൻ ആരാധിക്കുന്ന ക്രിക്കറ്ററാണ്. എന്നെ അദ്ദേഹവുമായി താരതമ്യം ചെയ്യരുത്. ക്രിക്കറ്റിൽ ഞാൻ പലതും പഠിക്കുന്നത് അദ്ദേഹത്തെ കണ്ടാണെന്നാണ് ബാബർ അസം പറഞ്ഞത്.
” ആരാധകർ ഞങ്ങളുടെ പേരിൽ നടത്തുന്ന ഫാൻ ഫൈറ്റിനെ കുറിച്ച് ഞാൻ മറുപടി പറയുന്നില്ല, എന്റെ കരിയറിന്റെ തുടക്കം മുതൽ അദ്ദേഹത്തെ ശ്രദ്ധിക്കുമായിരുന്നു. അദ്ദേഹത്തെ നേരിട്ട് കണ്ട് സംസാരിച്ചു. അത് എന്നെ വലിയ അളവിൽ സ്വാധീനിച്ചിട്ടുണ്ട്. ഇന്ത്യ മാത്രമല്ല, എല്ലാ രാജ്യങ്ങളിൽ നിന്നുമുള്ള താരങ്ങളും തമ്മിൽ പരസ്പര ധാരണയുണ്ടാക്കുന്നത് നല്ലതാണ്.” ബാബർ പറഞ്ഞു.
സ്ഥിരതയോടെ കളിക്കുന്ന താരമാണ് വിരാട് കോഹ്ലി. കോഹ്ലി കളിക്കുന്ന ശൈലി എനിക്ക് വളരെ ഇഷ്ടമാണ്. അത് ഞാൻ ആസ്വദിക്കുകയാണ്.
എന്നോടുള്ള അദ്ദേഹത്തിന്റെ മനോഭാവം ഒരിക്കൽ പോലും മാറിയിട്ടില്ല. വളർന്നുവരുന്ന തലമുറയെ കോഹ്ലിയെ പോലെയുള്ള താരങ്ങൾ പ്രചോദിപ്പിച്ചുകൊണ്ടിരിക്കും. എല്ലാ ഫോർമാറ്റുകളിലും ലോകത്തിലെ ഏറ്റവും മികച്ച ബാറ്ററാണ് വിരാടെന്നും ബാബർ കൂട്ടിച്ചേർത്തു.
Comments