‘മകൾക്കൊപ്പം എന്റെ ആദ്യ വരലക്ഷ്മി വ്രതം’; ലക്ഷ്മി ദേവിയെ പൂജിച്ച് ഉപാസന; സന്തോഷം പങ്കുവെച്ച് രാം ചരൺ

പതിനൊന്ന് വർഷത്തെ കാത്തിരിപ്പുകൾക്ക് ഒടുവിലാണ് രാം ചരൺ, ഉപാസന ദമ്പതികൾക്ക് കുട്ടി ജനിച്ചത്. 2023 ജൂൺ 20-നാണ് ഉപാസന പെൺകുഞ്ഞിന് ജന്മം നൽകിയത്. ക്ലിം കാര എന്നാണ് കുട്ടിക്ക് ഇരുവരും പേര് നൽകിയത്. തങ്ങളുടെ പ്രിയ പുത്രിയുടെ വിശേഷം താരങ്ങൾ സമൂഹമാദ്ധ്യമങ്ങൾ വഴി പങ്കുവെയ്‌ക്കാറുമുണ്ട്. കുഞ്ഞിനായി ‘ജം​ഗിൾ ലുക്ക് നഴ്‌സറി’ ഒരുക്കിയും മുത്തച്ഛനായ ചിരഞ്ജീവി പേരക്കുട്ടിയെ കൊഞ്ചിക്കുന്നതുമെല്ലാം ആരാധകർ ഏറ്റെടുത്തിരുന്നു. ഇപ്പോഴിതാ, ക്ലിൻ കാരയ്‌ക്കൊപ്പം ‘വരലക്ഷ്മി വ്രതം’ അനുഷ്ഠിക്കുന്ന ഉപാസനയുടെ ചിത്രങ്ങളാണ് സമൂഹമാദ്ധ്യമങ്ങളിൽ വൈറലാകുന്നത്.

ഉപാസന തന്നെയാണ് ഇൻസ്റ്റാ​ഗ്രമിലൂടെ ചിത്രങ്ങൾ പങ്കുവെച്ചത്. ‘കൂടുതൽ ഒന്നും ആവശ്യപ്പെടുന്നില്ല. എന്റെ ക്ലിൻ കാരയ്‌ക്കൊപ്പം എന്റെ ആദ്യത്തെ വരലക്ഷ്മി വ്രതം’- എന്ന് കുറിച്ചു കൊണ്ടാണ് താരം ചിത്രം പങ്കിട്ടത്. പോസ്റ്റിന് താഴെ രാം ചരൺ ലവ് സ്മൈലിയും കമന്റ് ചെയ്തിട്ടുണ്ട്. നിമിഷ നേരങ്ങൾ കൊണ്ടാണ് ചിത്രം സമൂഹമാദ്ധ്യമങ്ങളിൽ വൈറലായത്. ആരാധകരും സിനിമാ പ്രേമികളും സുഹൃത്തുക്കളും കുടുംബാം​ഗങ്ങളുമെല്ലാം പോസ്റ്റിന് താഴെ തങ്ങളുടെ സന്തോഷം പങ്കുവെയ്‌ക്കുകയാണ്. ഐശ്വര്യത്തിന്റെ ദേവതയായ ലക്ഷ്മിയെ പ്രീതിപ്പെടുത്തുന്നതിനുള്ള ഒരു ഹിന്ദു ആചരണമാണ് വരലക്ഷ്മി വ്രതം.

2012 ജൂൺ 14-നായിരുന്നു രാം ചരണും ഉപാസനയും തമ്മിലുള്ള വിവാഹം. കോളേജ് പഠന കാലത്ത് ലണ്ടനിൽ വച്ച് കണ്ടുമുട്ടിയ ഇരുവരും സൗഹൃദത്തിലാകുകയും പിന്നീട് പ്രണയത്തിലാകുകയുമായിരുന്നു. 2011-ലായിരുന്നു ഇരുവരുടെയും വിവാഹ നിശ്ചയം നടക്കുന്നത്. ഹനുമാൻ ഭ​ഗവാന്റെ അനുഗ്രഹത്തോടെ ഉപാസനയും രാംചരണും അവരുടെ ആദ്യ കുഞ്ഞിന്റെ വരവിനായി കാത്തിരിക്കുന്നു എന്ന് കുറിച്ചു കൊണ്ട് ചിരഞ്ജീവി ആയിരുന്നു തനിക്ക് പേരക്കുട്ടി ജനിക്കാൻ പോകുന്ന കാര്യം വെളിപ്പെടുത്തിയത്.