പോലീസ് രജിസ്റ്റർ ചെയ്ത കേസുകളുടെ എഫ്‌ഐആർ പകർപ്പ് ലഭിക്കാൻ ഇനി പോലീസ് സ്‌റ്റേഷനിൽ പോകേണ്ടതില്ല. കേരള പോലീസിന്റെ ഔദ്യോഗിക ആപ്പായ പോൽ ആപ്പ് വഴി ഇത് ഡൗൺലോഡ് ചെയ്‌തെടുക്കാവുന്നതാണ്. ഈ സൗകര്യം പോലീസിന്റെ ഔദ്യോഗിക വെബ്‌സൈറ്റിലും തുണ വെബ് പോർട്ടലിലും ലഭിക്കും.
രാജ്യദ്രോഹവുമായി ബന്ധപ്പെട്ട കേസുകൾ, ലൈംഗികാതിക്രമവുമായി ബന്ധപ്പെട്ട് സ്ത്രീകളുടെയും കുട്ടികളുടെയും പേര് നിയമപരമായി വെളിപ്പെടുത്താൻ കഴിയാത്ത കേസുകൾ ഒഴികെയുള്ള എല്ലാത്തരം കേസുകളുടെയും എഫ്‌ഐആർ ഡൗൺലോഡ് ചെയ്‌തെടുക്കാവുന്നതാണ്.
എഫ്ഐആറിന്റെ പകർപ്പ് എങ്ങനെ ഡൗൺലോഡ് ചെയ്യാം?
പോൽ ആപ്പ് ഇൻസ്റ്റാൾ ചെയ്തതിനുശേഷം മൊബൈൽ നമ്പർ ഉപയോഗിച്ച് രജിസ്റ്റർ ചെയ്യുക. എഫ്‌ഐആർ ഡൗൺലോഡ് ഓപ്ഷനിൽ എഫ്‌ഐആർ നമ്പർ, കേസ് രജിസ്റ്റർ ചെയ്ത വർഷം, ജില്ല, പോലീസ് സ്റ്റേഷന്റെ പേര് എന്നിവ നൽകി സെർച്ച് ചെയ്യാവുന്നതാണ്. എഫ്‌ഐആർ നമ്പർ അറിയില്ലെങ്കിൽ സ്റ്റാർട്ടിംഗ് ഡേറ്റ്, എൻഡിംഗ് ഡേറ്റ് സെലക്ട് ചെയ്ത് നൽകിയാൽ ആ കാലയളവിൽ രജിസ്റ്റർ ചെയ്ത കേസുകളുടെ ലിസ്റ്റ് ലഭിക്കും. അതിൽ നിന്ന് ആവശ്യമായ എഫ്‌ഐആർ ഡൗൺലോഡ് ചെയ്യാവുന്നതാണ്. ഇതിലെ ക്യൂആർ കോഡ് സ്‌കാൻ ചെയ്ത് എഫ്ഐആറിന്റെ ആധികാരികത ഉറപ്പ് വരുത്താം.
Comments