ആരോഗ്യം മെച്ചപ്പെടുത്താൻ കൃത്യമായ ഭക്ഷണ ശൈലി ശീലമാക്കേണ്ടത് അനിവാര്യമാണ്. അതുപോലെ തന്നെ ഭക്ഷണത്തിനു ശേഷമുള്ള ശീലങ്ങളും നമ്മുടെ ആരോഗ്യത്തെ മോശമായ രീതിയിൽ ബാധിച്ചേക്കാം. ഭക്ഷണം കഴിച്ച ശേഷം എന്തൊക്കെ ശീലങ്ങൾ ആരോഗ്യത്തിനു ഹാനീകരമാകുമെന്നു നോക്കാം..
ഭക്ഷണ ശേഷമുള്ള ഉറക്കം
ഭക്ഷണം കഴിച്ചു കഴിഞ്ഞാൽ ഒരു ഉറക്കം പതിവാണെന്നു പറയുന്നവരാണ് നമ്മിൽ ബഹുഭൂരിപക്ഷവും. എന്നാൽ ഭക്ഷണം കഴിച്ചയുടൻ കിടന്നുറങ്ങുന്നത് ശരീരത്തിനു നല്ലതല്ലെന്നാണ് വിദഗ്ധർ പറയുന്നത്. ഭക്ഷണത്തിനു ശേഷം ഒന്നോ രണ്ടോ മണിക്കൂർ നിവർന്നിരിക്കുകയോ ചാരി ഇരിക്കുകയോ ചെയ്യാം. ഇത് ഭക്ഷണം കൃത്യമായി ദഹിപ്പിക്കാനും നെഞ്ചെരിച്ചിൽ പോലുള്ളവ കുറയ്‌ക്കാനും സഹായിക്കുന്നു.
വെള്ളം ധാരാളമായി കുടിക്കുന്നത്
ഭക്ഷണം കഴിച്ചതിനു ശേഷം ധാരാളം വെള്ളം കുടിക്കുന്നത് പലരിലും കണ്ടു വരുന്ന ഒരു സ്വഭാവമാണ്. ശരീരത്തിൽ ജലാംശം ആവശ്യമാണെങ്കിലും ഭക്ഷണത്തിനു ശേഷം വെള്ളം കുടിക്കുന്നത് ശരീരത്തെ ദോഷകരമായി ബാധിക്കുന്നു. ഭക്ഷണം കഴിച്ച ഉടൻ അമിതമായി വെള്ളം കുടിക്കുന്നത് ദഹന പ്രക്രിയയ്‌ക്കു സഹായിക്കുന്ന വയറിലെ ആസിഡുകളെ നേർപ്പിക്കുകയും ദഹനം കൃത്യമായി നടക്കാതെ വരികയും ചെയ്യുന്നു. ഭക്ഷണം കഴിച്ച് അര മണിക്കൂറിന് ശേഷം വെള്ളം കുടിക്കുന്നതാണ് നല്ലത്.
കാപ്പി കുടിക്കുന്നത്
ഭക്ഷത്തിനോടൊപ്പമോ അതിനു ശേഷമോ കാപ്പി കുടിക്കുന്നവർ ഈ ശീലം ഒഴിവാക്കാൻ പ്രത്യേകം ശ്രദ്ധിക്കുക. കാപ്പിയിലും ചായയിലും അടങ്ങിയിരിക്കുന്ന കഫീൻ ഭക്ഷണത്തിലൂടെ ലഭിക്കുന്ന പോഷകഘടകങ്ങളെ ആഗിരണം ചെയ്യുന്നു. ഭക്ഷണം കഴിച്ച് കുറച്ചു സമയത്തിനു ശേഷം ഇത്തരം പാനീയങ്ങൾ കുടിക്കുന്നതാണ് ശരീരത്തിനു നല്ലത്.
