ഇന്ത്യൻ ചലച്ചിത്ര ലോകത്തിൽ റോക്കി ഭായ് സൃഷ്ടിച്ച തരംഗം ചലച്ചിത്ര പ്രേമികൾക്ക് ഒരിക്കലും മറക്കാനാകില്ല. പാൻ ഇന്ത്യൻ ചലച്ചിത്രമായ കെജിഎഫ്, യഷിന്റെ കരിയറിൽ വൻ ബ്രേക്കാണ് നൽകിയത്. കെജിഎഫ് 3-ക്കായി ആരാധകർ കാത്തിരിക്കുമ്പോഴാണ് മലയാളികളുടെ സ്വന്തം ഗീതു മോഹൻദാസ് സംവിധാനം ചെയ്യുന്ന ചിത്രത്തിൽ യഷ് എത്തുമെന്നുള്ള റിപ്പോർട്ടുകൾ പ്രചരിച്ചത്. ഇതുമായി ബന്ധപ്പെട്ട് ചലച്ചിത്ര ലോകത്തിൽ നിന്നും ഔദ്യോഗിക പ്രതികരണങ്ങൾ ഇതുവരെയുണ്ടായിട്ടില്ല. ഇതിനിടയിലാണ് യഷിന്റെ പുതിയ ചിത്രങ്ങൾ സമൂഹ മാദ്ധ്യമങ്ങളിൽ വൈറലായിരിക്കുന്നത്.
ഹോളിവുഡ് നടനും, സംവിധായകനും, ആക്ഷൻ കൊറിയോഗ്രാഫറുമായ ജെ ജെ പെറിക്കൊപ്പമുള്ള യഷിന്റെ പുതിയ ചിത്രങ്ങളാണ് ആരാധകർക്കിടയിൽ ഇപ്പോൾ ചർച്ചയാവുന്നത്. പുതിയ ചിത്രത്തിന് വേണ്ടിയുള്ള തയ്യാറെടുപ്പുകൾക്കും ലുക്ക് ടെസ്റ്റിനുമായി ലണ്ടനിലാണ് യഷ് ഇപ്പോൾ താമസിക്കുന്നത്. ഇവിടെ വെച്ചാണ് പെറിയെ കണ്ടുമുട്ടിയിരിക്കുന്നത്. ഈ കൂടിക്കാഴ്ചയ്ക്കു പിന്നിൽ കന്നട സൂപ്പർ താരം ഹോളിവുഡിലേക്ക് ചേക്കേറുകയാണോ എന്നും യഷിന്റെ അടുത്ത ചിത്രത്തിനായി ആക്ഷൻ സീനുകൾ കൊറിയോഗ്രാഫ് ചെയ്യാനായി പെറി എത്തുമോ എന്നുള്ള ചർച്ചകളുമാണ് ആരാധകർക്കിടയിൽ സജീവമാകുന്നത്. അതേസമയം ഗീതുമോഹൻദാസ് സംവിധാനം ചെയ്യുന്ന ചിത്രത്തിന് ‘യഷ് 19’ എന്നാണ് താത്കാലികമായി പേരിട്ടിരിക്കുന്നത്. ഇതിന്റെ ഔദ്യോഗിക പ്രഖ്യാപനത്തിനായി കാത്തിരിക്കുകയാണ് സിനിമാ പ്രേമികൾ.