കൊച്ചി: മുനമ്പത്ത് ഫൈബർ ബോട്ട് മറിഞ്ഞ് നാല് പേരെ കാണാതായി. ഏഴംഗ സംഘം പോയ ബോട്ടാണ് കടലിൽ മുങ്ങിയത്. മാലിപ്പുറത്തു നിന്നും പോയ സമൃദ്ധി ഇൻബോഡ് വള്ളമാണ് അപകടത്തിൽ പെട്ടത്. ബോട്ടിലുണ്ടായിരുന്ന മറ്റു മൂന്നു പേരെ രക്ഷപ്പെടുത്തിയതായി പോലീസ് അറിയിച്ചു.
രാത്രി 9 മണിയോടെയാണ് അപകടം.സമൃദ്ധി ഇൻബോഡ് വള്ളത്തിൽ മീൻ പിടിക്കാൻ പോയ ചെറു ഫൈബർ ബോട്ടാണ് മറിഞ്ഞത്. ഇതിൽ ആനന്ദൻ, മണികണ്ഠൻ, ബൈജു എന്നിവരെയാണ് മറ്റൊരു ബോട്ടിൽ വന്ന മത്സ്യത്തൊഴിലാളികൾ രക്ഷപ്പെടുത്തിയത്. മത്സ്യത്തൊഴിലാളികളും രക്ഷാപ്രവർത്തകരും ചേർന്ന് കടലിൽ കാണാതായ മറ്റു നാലു പേർക്കായി തിരച്ചിൽ നടത്തി വരികയാണ്.
