മുംബൈ: വസായ് സനാതന ധർമ്മസഭ സംഘടിപ്പിക്കുന്ന രാഷ്ട്രചേതന സഭ നാളെ നടക്കും.ഞായറാഴ്ച വൈകുന്നേരം 5 മണിക്ക് വസായ് റോഡ് വെസ്റ്റിലെ സായി നഗർ മൈതാനത്ത് വച്ചാണ് സമ്മേളനം നടക്കുക. ഭോപ്പാൽ എം.പി സാധ്വി പ്രഗ്യാ സിംഗ് ഠാക്കൂർ ഹിന്ദുമഹാസമ്മേളനത്തിൽ മുഖ്യാതിഥിയാകും. കൂടാതെ വിശ്വഹിന്ദു പരിഷത്ത്, ബജ്‌റംഗ്ദൾ തുടങ്ങിയ ഹൈന്ദവ സംഘടനകളുടെ നേതാക്കളും മഹാരാഷ്‌ട്രയുടെ വിവിധ പ്രദേശങ്ങളിൽ നിന്നുള്ള സന്യാസിശ്രേഷ്ഠൻമാരും പങ്കെടുക്കും.
സമീപകാലത്ത് സമൂഹത്തിന്റെ വിവിധ കോണുകളിൽ നിന്നുയരുന്ന സനാതന ധർമ്മ വിരുദ്ധ പ്രവർത്തനങ്ങൾക്കെതിരെ പ്രതിരോധമുയർത്താനും സനാതന ധർമ്മത്തിന്റെ മഹത്വം ഉയർത്തിക്കാട്ടുവാനുമാണ് രാഷ്ട്രചേതന സഭ സംഘടിപ്പിക്കുന്നതെന്ന് വസായ് സനാതന ധർമ്മസഭ അദ്ധ്യക്ഷൻ കെ.ബി ഉത്തംകുമാർ അറിയിച്ചു.
എവർഷൈൻ ഗേറ്റിൽ നിന്നും ആരംഭിക്കുന്ന ബൈക്ക് റാലിയുടെയും വിവിധവാദ്യഘോഷങ്ങളുടെയും അകമ്പടിയോടുകൂടിയാണ് സാധ്വി പ്രഗ്യാ സിംഗ് ഠാക്കൂറിനെ സമ്മേളന നഗരിയിലേക്ക് ആനയിക്കുക. ഒക്ടോബർ രണ്ടിന് രാഷ്ട്രചേതന സഭയുടെ സ്വാഗതസംഘം ഓഫീസ് ഉദ്ഘാടനം ചെയ്തിരുന്നു. വസായ് ഹനുമാൻ ലക്ഷ്മിദാം ആശ്രമ മഠാധിപതി മഹന്ത് സദാനന്ദ് ബെൻ മഹാരാജാണ് ഓഫീസ് ഉദ്ഘാടനം നിർവഹിച്ചത്. മാത്രമല്ല സമ്മേളനത്തിന്റെ വിജയകരമായ നടത്തിപ്പിനായി വസായ് ഹനുമാൻ ലക്ഷ്മിദാം ആശ്രമ മഠാധിപതി മഹന്ത് സദാനന്ദ് ബെൻ മഹാരാജ് അദ്ധ്യക്ഷനായി നൂറ്റിയൊന്നംഗ സ്വാഗതസംഘം രൂപവത്കരിക്കുകയും ചെയ്തിരുന്നു.
