ആലപ്പുഴ: വെട്ടിക്കോട് നാഗരാജ സ്വാമി ക്ഷേത്രത്തിലെ പ്രസിദ്ധമായ ആയില്യം ഉത്സവം ഭക്തിനിർഭരമായ ചടങ്ങുകളോടെ നടന്നു. തൊഴുത് പുണ്യം തേടിയത് ലക്ഷക്കണക്കിന് ഭക്തജനങ്ങളാണ്.
വൈകുന്നേരം 3-ന് പ്രസിദ്ധമായ ആയില്യം എഴുന്നള്ളത്ത് നടന്നു. ആയില്യം എഴുന്നള്ളത്ത് തൊഴുന്നവർക്ക് ഒരു വർഷത്തേക്ക് വിഷഭയം ഉണ്ടാകില്ലെന്നാണ് വിശ്വാസം. ആയില്യം മഹോത്സവത്തിന്റെ ഭാഗമായുള്ള പൂയം ഉത്സവം ഇന്നലെ നടന്നു. കന്നി – തുലാം മാസങ്ങളിലെ പൂയം നാളിൽ മാത്രമാണ് ക്ഷേത്രത്തിൽ ദീപാരാധന നടത്തുന്നത്. പൂയം ഉത്സവത്തിനും വൻ ഭക്തജന പ്രവാഹമായിരുന്നു.
ആലപ്പുഴ ജില്ലയിൽ കായംകുളം-പുനലൂർ പാതയിലെ കറ്റാനത്തിനടുത്ത് സ്ഥിതിചെയ്യുന്ന ക്ഷേത്രമാണ് വെട്ടിക്കോട്ട് ആദിമൂലം നാഗരാജക്ഷേത്രം. കേരളത്തിലെ ആദ്യത്തെ നാഗരാജ ക്ഷേത്രമാണ് ഇതെന്നാണ് വിശ്വാസം. നാഗരാജാവായ അനന്തനാണ് ഇവിടുത്തെ പ്രധാന പ്രതിഷ്ഠ. അനന്തന്റെ പുറത്ത് ഭഗവാൻ മഹാവിഷ്ണു ശയിക്കുന്നു എന്നാണ് വിശ്വാസം.
പണ്ട് പരശുരാമൻ മഴു കൊണ്ട് മണ്ണ് വെട്ടിക്കൂട്ടി അതിന് മുകളിൽ നാഗരാജ പ്രതിഷ്ഠ നടത്തിയതിനാലാണ് വെട്ടിക്കോട്ട് എന്ന പേരുണ്ടായതെന്നാണ് ഐതിഹ്യം. ഭൂതലത്തിൽ ആദ്യമായി നാഗരാജ പ്രതിഷ്ഠ നടന്നത് വെട്ടിക്കോട്ട് ആയതിനാൽ ആദിമൂലം വെട്ടിക്കോട്ട് എന്ന പെരുമയും നേടി. ക്ഷേത്രത്തിലെത്തുന്ന ഭക്തജനങ്ങൾ ക്ഷേത്രത്തിന് പടിഞ്ഞാറ് ഭാഗത്തായി നിലകൊള്ളുന്ന മൂലസ്ഥാനത്തും നിലവറയിലും ഒപ്പം ആഗമ സർപ്പക്കാവിലും, അഷ്ടനാഗത്തറയിലും ദർശനം നടത്തി സർപ്പദോഷ മുക്തിക്കായി പ്രാർത്ഥിക്കുന്നു.
