ന്യൂയോര്ക്ക്: ഫുട്ബോള് ലോകം കാത്തിരിക്കുന്ന 2026 ലോകകപ്പ് ഫൈനലിന് ഇനി മണിക്കൂറുകള് മാത്രം. ഞായറാഴ്ച ന്യൂയോര്ക്കിലെ മെറ്റ്ലൈഫ് സ്റ്റേഡിയത്തില് അര്ജന്റീനയും സ്പെയിനും നേര്ക്കുനേര് വരുമ്പോള്, കിരീടപ്പോരിനപ്പുറം ലോകമെമ്പാടുമുള്ള ആരാധകരെ വികാരഭരിതരാക്കുന്നത് മറ്റൊരു കഥയാണ്. ഒരു വശത്ത് കരിയറിന്റെ അവസാന അധ്യായത്തിലും അത്ഭുതങ്ങള് സൃഷ്ടിക്കുന്ന ഇതിഹാസം ലയണല് മെസി. മറുവശത്ത്, ലോക ഫുട്ബോളിന്റെ പുതിയ സൂപ്പര്താരം ലാമിന് യമാല്. ഒരുകാലത്ത് മെസിയുടെ കൈകളിലിരുന്ന കുഞ്ഞായിരുന്നു ഇന്ന് ലോകകപ്പ് ഫൈനലില് അദ്ദേഹത്തിന്റെ എതിരാളി.
2007-ല് ബാഴ്സലോണയുടെ ക്യാംപ് നൗവില് നടന്ന ഒരു ചാരിറ്റി ഫോട്ടോഷൂട്ടിലാണ് ഈ അപൂര്വ നിമിഷം പിറന്നത്. യുനിസെഫും കറ്റാലന് ദിനപത്രമായ ഡിയാരിയോ സ്പോര്ട്ടും ചേര്ന്ന് സംഘടിപ്പിച്ച പരിപാടിയില് വെറും 20 വയസ്സുകാരനായ മെസി, അഞ്ചുമാസം പ്രായമുള്ള ഒരു കുഞ്ഞിനെ കുളിപ്പിക്കുന്ന ചിത്രമാണ് പകര്ത്തിയത്. ആ കുഞ്ഞ് പിന്നീട് ലോകം മുഴുവന് വിസ്മയത്തോടെ നോക്കുന്ന ലാമിന് യമാലാണെന്ന് വര്ഷങ്ങള്ക്കുശേഷമാണ് പുറത്തറിഞ്ഞത്.
യമാലിന്റെ കുടുംബത്തിന് മെസിക്കൊപ്പമുള്ള ഫോട്ടോഷൂട്ടിന് അവസരം ലഭിച്ചത് യുനിസെഫിന്റെ ചാരിറ്റി ലോട്ടറിയിലൂടെയായിരുന്നു. ചിത്രം പകര്ത്തിയ പ്രശസ്ത ഫോട്ടോഗ്രാഫര് ജോവാന് മോണ്ഫോര്ട്ടിനുപോലും അത് യമാലാണെന്ന് വര്ഷങ്ങള്ക്കുശേഷമാണ് മനസ്സിലായത്. 2024-ല് യമാലിന്റെ പിതാവ് ആ ചിത്രം സമൂഹമാധ്യമങ്ങളില് പങ്കുവെച്ചതോടെയാണ് ലോകം ആ അപൂര്വ നിമിഷം വീണ്ടും കണ്ടത്. ‘രണ്ട് ഇതിഹാസങ്ങളുടെ തുടക്കം’ എന്ന അടിക്കുറിപ്പോടെയായിരുന്നു ചിത്രം വൈറലായത്.
ആ ദിവസത്തെ ഓര്മ്മകള് പങ്കുവെച്ച മോണ്ഫോര്ട്ട് പറഞ്ഞത് ഇങ്ങനെയാണ്: ‘മെസി അന്ന് വളരെ നാണംകുണുങ്ങിയ ചെറുപ്പക്കാരനായിരുന്നു. ഒരു കുഞ്ഞിനെ എങ്ങനെ കൈകാര്യം ചെയ്യണമെന്നറിയാതെ ആദ്യം അല്പം പകച്ചുപോയി. എന്നാല് യമാല് ശാന്തനായും എപ്പോഴും ചിരിക്കുന്ന കുഞ്ഞുമായിരുന്നതിനാല് ഫോട്ടോഷൂട്ട് വളരെ മനോഹരമായി പൂര്ത്തിയായി.’
മെസി 2021-ല് ബാഴ്സലോണ വിട്ടെങ്കിലും, നാല് വര്ഷത്തിന് ശേഷം ക്ലബ്ബിന്റെ ഐതിഹാസികമായ പത്താം നമ്പര് ജേഴ്സിയുടെ പുതിയ അവകാശിയായി മാറിയത് യമാലാണ്. അതും ഈ കഥയ്ക്ക് മറ്റൊരു മനോഹരമായ യാദൃശ്ചികതയായി.
കൗമാരപ്രായത്തിലെ പ്രകടനങ്ങളില് പോലും യമാല് വിസ്മയം തീര്ത്തിരിക്കുകയാണ്. 19 വയസ്സ് തികയുമ്പോള് മെസിയുടെ കരിയറില് 11 ഗോളുകള് മാത്രമായിരുന്നെങ്കില്, യമാലിന്റെ അക്കൗണ്ടില് ഇതിനോടകം 56 ഗോളുകളുണ്ട്. ലാ ലിഗയില് ഈ പ്രായത്തിനുള്ളില് മെസി ഒരു കിരീടം പോലും നേടിയിരുന്നില്ലെങ്കിലും യമാല് മൂന്ന് ലാ ലിഗ കിരീടങ്ങള് സ്വന്തമാക്കി. 2024 യൂറോ കപ്പും സ്പെയിനിനൊപ്പം ഉയര്ത്തിയിട്ടുണ്ട്. എന്നാല് 19-ാം വയസ്സില് തന്നെ ചാമ്പ്യന്സ് ലീഗ് കിരീടം നേടിയെന്ന നേട്ടത്തില് ഇപ്പോഴും മെസിയാണ് മുന്നില്.
റൊക്കാഫോണ്ടെയിലെ സാധാരണ കുടുംബത്തില് നിന്ന് ലോക ഫുട്ബോളിന്റെ നെറുകയിലേക്ക് ഉയര്ന്ന യമാല്, തന്റെ വിജയത്തിന് പിന്നില് മാതാപിതാക്കളുടെ ത്യാഗമാണെന്ന് പലപ്പോഴും തുറന്നുപറഞ്ഞിട്ടുണ്ട്. മറുവശത്ത് എട്ട് ലോകകപ്പ് ഗോളുകളുമായി അര്ജന്റീനയെ തുടര്ച്ചയായ രണ്ടാം ലോകകപ്പ് കിരീടത്തിലേക്ക് നയിക്കാന് ഒരുങ്ങുകയാണ് മെസി.
ന്യൂയോര്ക്കിലെ ഈ ഫൈനല് അതുകൊണ്ട് ഒരു ലോകകപ്പ് കലാശപ്പോരെന്നതിലുപരി, ഒരു തലമുറ മറ്റൊരു തലമുറയ്ക്ക് വഴിമാറുന്ന ചരിത്രനിമിഷം കൂടിയാണ്. ഒരിക്കല് മെസിയുടെ കൈകളിലിരുന്ന കുഞ്ഞ് ഇന്ന് അദ്ദേഹത്തിനെതിരെ ലോകകപ്പ് കിരീടത്തിനായി പോരാടുമ്പോള്, ഫുട്ബോള് ചരിത്രം മറ്റൊരു അവിസ്മരണീയ അധ്യായത്തിന് സാക്ഷിയാകുകയാണ്.
