മറ്റാരുടെയെങ്കിലും കയ്യിൽ നമ്മുടെ ഡാറ്റ മുഴുവൻ കിട്ടിയാലോ എന്നതാണ് പെൻഡ്രൈവിലേക്ക് ഡാറ്റ മാറ്റുമ്പോഴുള്ള എല്ലാവരുടെയും ആശങ്ക. ഇത്തരത്തിൽ സ്വകാര്യത സംരക്ഷിക്കുന്നതിനായി പുതിയ ഫീച്ചറുമായി എത്തിയിരിക്കുകയാണ് ലെക്സർ. മറ്റുള്ളവർ കൈകടത്താതിരിക്കാൻ ഫിംഗർപ്രിന്റ് സെക്യൂരിറ്റി ഫീച്ചറുള്ള പെൻഡ്രൈവ് അവതരിപ്പിച്ചിരിക്കുകയാണ് ലെക്സർ. ജമ്പ് ഡ്രൈവ് എഫ് 35 എന്ന പേരിലാണ് പെൻഡ്രൈവ് ഇന്ത്യയിൽ അവതരിപ്പിച്ചിരിക്കുന്നത്. 300 MB/s റീഡ് സ്പീഡുള്ള യുഎസ്ബി 3.0 ഡ്രൈവ് ആണിത്.
ജോലി സംബന്ധമായ കാര്യങ്ങൾക്കും സ്വകാര്യ ആവശ്യങ്ങൾക്കും ഇത്തരത്തിൽ പെൻഡ്രൈവിൽ ഡാറ്റാ സൂക്ഷിക്കേണ്ടതായി വരാറുണ്ട്. ഇത് ചിലപ്പോൾ വീഡിയോ, ഫോട്ടോ, ഡോക്യുമെന്റ് എന്നിങ്ങനെ എന്തുമാകാം. ഇവ എളുപ്പത്തിൽ കൈമാറ്റം ചെയ്യുന്നതിനും സൂക്ഷിക്കുന്നതിനും പെൻഡ്രൈവുകളാണ് അധിക ആളുകളും ഉപയോഗിക്കുന്നത്. കയ്യിൽ സൂക്ഷിക്കാൻ എളുപ്പം എന്നതാണ് ഇത് ജനപ്രിയമാകാനുള്ള പ്രധാന കാരണം.
എന്നാൽ പെൻഡ്രൈവിൽ സേവ് ചെയ്തിട്ടുള്ള ഡാറ്റ സുരക്ഷിതമാക്കുക എന്നത് വളരെ വെല്ലുവിളികൾ നിറഞ്ഞ ഒന്നാണ്. ഉപയോക്താവിന്റെ കയ്യിൽ നിന്നും പെൻഡ്രൈവ് നഷ്ടമാകുകയാണ് എങ്കിൽ കയ്യിൽ കിട്ടുന്ന ആർക്കും ഇത് കൈക്കലാക്കാൻ സാധിക്കും. ഇവയിലേക്ക് ആക്സസ് പെട്ടെന്ന് ലഭിക്കുന്ന എന്നത് തന്നെയാണ് കാരണം. ഫിംഗർപ്രിന്റ് നിലവിൽ വരുന്നതോടെ ഇതിന് ഒരു പരിഹാരമായിരിക്കുകയാണ്.
ഫിംഗർപ്രിന്റ് സുരക്ഷാ സംവിധാനത്തോട് കൂടി എത്തുന്ന ലെക്സറിന്റെ പെൻഡ്രൈവിൽ വിരലടയാളത്തിലൂടെ വിവരങ്ങൾ സൂക്ഷിക്കാനാകും. ഡാറ്റ സുരക്ഷിതമാക്കുന്നതിന് വേണ്ടി 256എഇഎസ് എൻക്രിപ്ഷൻ സ്റ്റാൻഡേർഡ് ആണ് ഉപയോഗിക്കുന്നത്. 10 വിരലടയാളങ്ങൾ വരെ ഇതിൽ ഉൾപ്പെടുത്താൻ സാധിക്കും.