ന്യൂഡൽഹി: മാരുതി സുസുക്കിക്ക് ഇന്ത്യയിലുള്ള സ്വീകാര്യത വലുതാണ്. നിരവധി മോഡൽ വാഹനങ്ങളാണ് മാരുതി നിരത്തിലിറക്കുന്നത്. എന്നാൽ മാരുതി സുസുക്കി ഐസി എൻജിൻ കാറുകൾ നിർത്തലാക്കാൻ പോവുകയാണെന്നാണ് പുറത്ത് വരുന്ന റിപ്പോർട്ടുകൾ.
ഘട്ടം ഘട്ടമായി ആറ് വർഷത്തിനുള്ളിലായിരിക്കും കമ്പനി ഈ നടപടി പ്രാബല്യത്തിൽ കൊണ്ടുവരുന്നത്. സിഎൻജി, ഇലക്ട്രിക് കാർ തുടങ്ങിയ മോഡലുകൾക്ക് പ്രാധാന്യം നൽകുന്നതിന് വേണ്ടിയാണ് മാരുതിയുടെ ഈ നടപടി.
2030 ഓടെ ഐസി എൻജിനുകൾ നിർത്തലാക്കി സിഎൻജി, ഹൈബ്രിഡ്, ഇവി കംപ്രസ്ഡ് ബയോ ഗ്യാസ് (സിബിജി) അധിഷ്ഠിത മോഡലുകൾ എന്നിവ നിരത്തിൽ അവതരിപ്പിക്കാനാണ് കമ്പനി ലക്ഷ്യമിടുന്നത്. നിലവിൽ ഈ മോഡലുകളിൽ ചില വാഹനങ്ങൾ മാരുതി അവതരിപ്പിച്ചിട്ടുണ്ട്. എന്നാൽ അവയുടെയെല്ലാം നവീകരിച്ചതും കൂടുതൽ മികവുറ്റതുമായ വാഹനങ്ങളായിരിക്കും ആറ് വർഷത്തിനുള്ളിൽ കമ്പനി അവതരിപ്പിക്കാൻ പോകുന്നത്. പെട്രോൾ വാഹനങ്ങളിൽ നിന്നുള്ള അമിത കാർബൺ പുറന്തള്ളൽ കുറയ്ക്കുന്നതിന് വേണ്ടിയാണ് മാരുതിയുടെ ഈ നീക്കം.